परासी — पश्चिम नवलपरासीको महेशपुर भन्सार कार्यालयले ६९ टन चिनी नष्ट गरेको छ । लामो समयदेखि गोदाममा थन्काएर राखिएको चिनी नष्ट गरिएको हो । ग्राहकले प्रयोग गर्न अयोग्य ठहर भएको चिनी भन्सार कार्यालयले नष्ट गरेको कार्यालय प्रमुख विकास उपाध्यायले बताए ।

५० किलोका बोरामा प्याक गरिएको १ हजार ३ सय ८० बोरा चिनी पाल्हिनन्दनको झरही खोला किनारमा नष्ट गरिएको हो । सुरक्षा निकायले विभिन्न समयमा बरामद गरेको चिनी भन्सार कार्यालयमा बुझाए पनि समयमा नै गुणस्तर परीक्षणका लागि खाद्य प्रविधि तथा गुण नियन्त्रण कार्यालयमा नपठाउँदा लाखौँ मूल्य पर्ने सामान नष्ट हुँदै आएको छ । चिनी सँगै भारतबाट क्वारेनटाइन र खाद्य गुणस्तर जाँच नगरी अवैध रूपमा भित्राएको ७० बोरा धानको बिउ पनि नष्ट गरिएको छ ।