बुटवल — लुम्बिनीमा मंगलबारदेखि बजेटमाथिको छलफल सुरु भएको छ । दिउँसो ३ बजे सुरु भएको बैठक १० मिनेट मात्र बसेर स्थगित भएको थियो । प्रतिपक्ष र सत्तापक्षबीच सहमतिका लागि आधा घण्टा रोकिएको बैठक राति साढे ८ बजेबाट सुरु भएको हो ।

स्थगित बैठक निरन्तर भएपछि आगामी आवको बजेटमा विरोध जनाउँदै माओवादी, नेकपा एस, जनमोर्चा, जसपा नेपाल लगायतका प्रतिपक्ष दलहरुले बैठक बहिस्कार गरेका थिए ।

दोस्रो बैठकमा प्रदेशसभा प्रतिपक्षविहीन भएपछि त्यसअघिको बैठकमा सत्तापक्षमा रहेको लोसपाले सरकारलाई दिएको समर्थन फिर्ता लिएको घोषणा गर्दै सभामुखलाई पत्र पठाएको थियो । सभामुखले तत्कालै पत्रमा तोक लगाएपछि लोसपालाई प्रतिपक्षको बेन्च तयार गरेर प्रदेशसभाको बैठक साढे ८ बजे रातिबाट सुरु भएको हो । लुम्बिनी प्रदेशसभामा लोसपाका तीन प्रदेशसभा सदस्य छन् । यसअघि जसपा नेपालले पनि सरकारलाई दिएको समर्थन फिर्ता लिएको थियो । जसपा नेपालका एक सदस्य छन् । 

प्रतिपक्षका माओवादीसहितका दलले बहिस्कार गरेपछि सुरु भएको प्रदेशसभाको बैठकको प्रतिपक्ष बेन्चमा लोसपाका ३ र जसपा नेपालका १ जना सदस्य छन् । बैठक सुरु भएपछि लुम्बिनी प्रदेशका आर्थिक मामिला तथा योजनामन्त्री धनेन्द्र कार्कीले बजेट बनाउने क्रममा प्रदेशसभा सदस्यका छुटेका योजना समावेश गर्ने छोटो वक्तव्य र प्रतिबद्धतासहित ‘आर्थिक वर्ष २०८२/०८३ को राजस्व र व्ययको वार्षिक अनुमान’ माथि सैद्धान्तिक छलफल प्रारम्भ गरियोस् भनी प्रस्ताव पेस गरेका थिए । बजेट माथिको सैद्धान्तिक छलफल सकिएको छ ।