तीन आर्थिक वर्षमा सबै गर्भवतीले स्वास्थ्य संस्थामा सुत्केरी सेवा लिएपछि यस्तो घोषणा गरिएको हो
प्युठान — गौमुखी गाउँपलिकालाई 'जिरो होम डेलिभरी’ पालिका घोषणा गरिएको छ । सबै गर्भवतीले स्वास्थ्य संस्थामा आएर सुत्केरी गराएकाले यस्तो घोषणा गरिएको हो ।
पछिल्ला तीन आर्थिक वर्षभित्र गाउँपालिकाभित्रका सबै गर्भवती स्वास्थ्य संस्थामा आएर सुत्केरी भएका हुन् ।
आर्थिक वर्ष २०७९/०८० मा ३ सय ३४ जना महिला गर्भवती रहेको गौमुखीमा सबैले स्वास्थ्य संस्थामा आएर प्रसूति सेवा लिएका थिए । २०८०/०८१ मा २८२ र ०८१/०८२ मा २९५ जना गर्भवतीले स्वास्थ्य संस्थाबाट प्रसूति सेवा लिएको गाउँपालिका स्वास्थ्य शाखा प्रमुख हरिप्रसाद जैसीले जानकारी दिए । ०८१/०८२ मा भने ६८ जनाले स्थानीय स्वास्थ्य संस्थाभन्दा बाहिर प्रसूति सेवा लिएको प्रमुख जैसीले बताए ।
२०७९/०८० मा १० र २०८०/०८१ मा ३ जना गर्भवती घरमा सुत्केरी भएका थिए ।
गाउँपालिकामा ४ पटक गर्भजाँच, तीनपटक सुत्केरी जाँच लगायत मापदण्ड पूरा गर्नेको संख्या ९५ प्रतिशतभन्दा माथि पुगेसँगै गाउँपालिकालाइ पूर्ण संस्थागत प्रसूति सेवायुक्त पालिका घोषणा गरिएको हो ।
शनिबार गाउँपालिकाको सभाहलमा भएको कार्यक्रममा लुम्बिनी प्रदेशसभा सदस्य धनलक्ष्मी श्रेष्ठ, जिल्ला समन्वय समिति प्युठानका प्रमुख धरमबहादुर जीसी लगायत सहभागी थिए ।
