रुकुम पूर्व — केन्द्रीय प्रसारण लाइन पुगेको रुकुम पूर्वका विभिन्न गाउँमा विद्युत् सेवा नियमित नहुँदा यहाँका स्थानीय आजित भएका छन् । बेला–बेलामा बिजुली आउने–जाने गर्दा व्यापार, व्यवसायका साथै सर्वसाधारणको दैनिकीमा प्रत्यक्ष असर परेको छ ।

बिजुली कतिबेला आउँछ र कतिबेला जान्छ भन्ने कुनै टुंगो नहुँदा सेवा दिन कठिन भइरहेको जिल्ला सदरमुकाम रुकुमकोटमा होटल व्यवसाय गरिरहेका जीवन केसीले बताए । ‘जोड्न त हामीले व्याकअप जोडेका छौं तर कहिले त यति लामो समय बिजुली जान्छ कि त्यो नै चार्ज हुन पाउँदैन,’ उनले भने ‘यसले गर्दा हामीलाई व्यावसायिक रूपमा काम गर्न र सेवा दिन कठिन भइरहेको छ ।’

अहिले बिजुली नभएर व्यापार–व्यवसायसँगै अरू पनि धेरै काम रोकिने भएकाले बिजुली नियमित हुन जरुरी रहेको भन्दै रुकुमकोट उद्योग वाणिज्य संघका अध्यक्ष केवेन्द्र गौतमले गुनासो गरे, ‘विद्युत् सेवा नियमित गर्न प्राधिकरणले आफ्नो तरिकाले काम गरिरहेको होला । तर हामीलाई भने चाहिएका बेला बिजुली नआउँदा समस्या भइरहेको छ । यसको समाधान भनेको यहाँ चाँडो भन्दा चाँडो सव–स्टेसन बन्नु नै हो ।’ 

झण्डै एक दशकअघि केन्द्रीय प्रसारण लाइनको पहुँचमा जोडिएको रुकुम पूर्वमा हालसम्म कुल ४३ सय ग्राहक भएको नेपाल विद्युत् प्राधिकरण रुकुम पूर्व वितरण केन्द्रका प्रमुख प्रमोद खनालले जानकारी दिए ।