परासी — गण्डक नहरअन्तर्गत पश्चिम सेक्टर पश्चिम नवलपरासीको नेपाली नहर पूर्ण क्षमतामा सञ्चालनमा आएको छ । नारायणी नदीको बालुवा जम्मा भएर पानीको सतह कम हुँदा नेपाली किसानले सिँचाइ गर्न पाएका थिएनन् ।
अहिले नहरमा नदीको बालुवा जान रोक्ने प्रविधि (डिसिल्ट्रेसन) जडान गरेपछि नहर पूर्ण क्षमतामा सञ्चालनमा आएको हो ।
सोमबार नेपाल सरकारका ऊर्जा, जलस्रोत तथा सिँचाइमन्त्री दीपक खड्का र नवलपरासी पश्चिम १ का प्रतिनिधिसभा सदस्य विनोद चौधरीले डिसिल्ट्रेसन प्रविधिको उद्घाटन गरे ।
मन्त्री खड्काले किसानलाई सिँचाइका लागि सरकारले भूमिगत र पुराना आयोजनाका नहरको पनि स्तरोन्नति गरिएको बताए । गण्डक नहरबाट नेपाली किसानलाई अधिकतम फाइदा र १२ महिना पर्याप्त सिँचाइ सुविधाका लागि राज्यले काम गरिरहेको उनको भनाइ थियो ।
नेपाल-भारत गण्डक सम्झौताअन्तर्गत २०३९ सालमा निर्माण भएको नहरमा बालुवा भरिँदा सिँचाइ सुविधाबाट किसानले लाभ लिन नसकेकाले ३० करोड ४० लाखको लागतमा बालुवा रोक्ने प्रविधि जडान गरिएको प्रतिनिधिसभा सदस्य चौधरीले बताए । धानको बिउ राख्ने र रोप्ने समयमा नहरमा पर्याप्त पानी आएपछि यस क्षेत्रका किसान खुसी भएका छन् ।
