बर्दिया — भूमि समस्या आयोग, बर्दियामा जग्गाधनी पुर्जाका लागि निवेदन दिनेको  संख्या बढ्दै गएको छ । आइतबारसम्म ४७ हजार ९ सय बढीले निवेदन दर्ता गराएको भूमि समस्या आयोगले जनाएको छ ।

गतवर्ष पुस २९ गते गठन भएको भूमि समस्या आयोग, बर्दियाले लगत छुटेका वा विभिन्न कारणले निवेदन दर्ता गर्न नसकेकाका लागि बैशाख मशान्तसम्मको हद म्याद राखेको छ । 

आयोगमा तीन किसिमका निवदेनका लागि आवश्यक प्रमाण पेश गर्नुपर्ने हुन्छ । तीन किसीमका निवेदनमा दलित, भूमिहिन सुकुम्बासी, अव्यवस्थित बासोबासी रहेका छन् । ठूलो संख्यामा निवेदन परेपछि जग्गा उपलब्ध गराउने समस्या देखिएको छ ।

वनको जग्गा भए पनि रुख विरुवा नभएका ठाउँमा बसोबास गर्दै आएकालाई जग्गाधनी पुर्जा उपलब्ध गराउने आयोगका सदस्य राम बहादुर थारुले बताए । हैसियत बिग्रेका वनमा बस्ती बसेको, सार्वजनिक जग्गा लगायत वर्षौंदेखि बसोबास गरेकाको हकमा जग्गाधनी पुर्जा वितरण गरिने उनले बताए । 

गुलरिया नगरपालिका–५ वालापुरको बस्तीमा २०२४ सालदेखि ऐलानी जग्गामा बस्दै आएका ६९ वर्षीय बुद्धिप्रसाद थारुले थुप्रै आयोग बने पनि समस्याको समाधान नभएको गुनासो पोखे । निवेदन धेरै पटक दर्ता गराए पनि जग्गाधनी पुर्जा नपाएको उनले सुनाए ।