बर्दिया — नदी कटान र बाढी न्यूनीकरणका लागि २०७४ सालमा स्थापना गरिएको बबई, भादा, औराही नदी व्यवस्थापन आयोजनाको काम पूरा नहुँदै डडेल्धुरा स्थानान्तरण गरिने भएको छ ।

आयोजनाको सम्पर्क कार्यालय भने कर्णाली नदी व्यवस्थान आयोजना, राजापुरमा रहने भएको छ । आउँदो साउन महिनाबाट आयोजना डडेल्धुरा जाने भएको छ । बबई, भादा, औराही नदी व्यवस्थापन आयोजना ०७४ साल असोज ९ गते गुलरियामा स्थापना भएको थियो । 

पाँच वर्षभित्र बबईको २८ किमी, भादाको २२ किमी र औराही नदीको २६ किमी तटबन्ध निर्माण गर्ने लक्ष्य थियो । आयोजना स्थापना भएको ५ वर्षभित्र तटबन्धको काम सम्पन्न गर्ने लक्ष्य भए पनि बजेटको अभावमा यसको लक्ष्य बढाएर आव ०८४/०८५ अवधि सम्म थियो । 

करिब ४ अर्बको लागतमा तटबन्धको काम सम्पन्न गर्ने लक्ष्य थियो । काम सम्पन्न नभएपछि ०७९ साल साउन १५ गतेको संशोधित गुरु योजना अनुसार ८ अर्ब ४८ करोड ४८ लाख लागत बजेट स्वीकृत गरिएको थियो, आयोजनाले जनाएको छ । 

बजेट स्वीकृत भए पनि माग अनुसार निकासा नहुँदा कामले गति नलिएको आयोजनाका प्राविधिक बताउँछन् । हालसम्म बबईमा ७७ दशमलव ८५ प्रतिशत भएको आयोजनाले जनाएको छ । यसै गरी भादामा ४ दशमलव ४३ प्रतिशत र औराहीमा २ दशमल २२ प्रतिशत मात्र भौतिक प्रगति भएको आयोजना प्रमुख शिव साहले बताए ।