पाल्पा — दाँया बाँया ठूलो भीर । भीरको बीचमा हिमालजस्तै डाँडा । यही डाँडा पहाडबाट देखिने मनोरम दृश्यले सबैलाई लोभ्याउने गर्छ । २५/३० वर्षअघिसम्म यही डाँडा भएर हिँड्ने बटुवा लिस्नोबाट ओर्लनुपर्ने थियो । त्यही लिस्नोमा चढेर अर्गली, रिडी, ऋषिकेश र गुल्मीका विभिन्न भेग जाने मुलबाटोसमेत भएकाले यो भीर डाँडाको नाम नै ‘लिस्ने भीर’ रहन गयो ।

तर अहिले यो बाटो बटुवा हिँड्न छाडेपछि लिस्नो पनि मासियो । पाल्पाको रिब्दिकोट गाउँपालिका–१, ख्याहामा पर्ने यही लिस्ने भीर एडभेन्चर पर्यटकको रोजाइ बन्दै गएको छ । पछिल्लो समय फोटो खिच्नका लागि विभिन्न संरचना बनाइएकाले यसलाई गाउँबासीले सेल्फीडाँडा नाम राखेका छन् । वडाध्यक्ष चिरञ्जीवी पोखरेलका अनुसार केही वर्षयता आन्तरिक पर्यटकका लागि आकर्षक गन्तव्य बनेको छ । 

‘बाबुबाजेहरु यही लिस्ने भीरबाट ओरालो झेर रिडी, ऋषिकेश र गुल्मीका विभिन्न भागमा जाने गर्नुहुन्थ्यो,’ उनले भने, ‘अहिले अब यही ठाउँलाई पर्यटकीय गन्तव्यका रुपमा विकास गर्ने योजना अघि बढेको छ ।’ उनका अनुसार यस्तो खालको प्रकृतिले दिएको अन्यत्र ठाउँ नभएको जस्तो लाग्छ । प्रकृतिले फरक ढंगको डाँडा निर्माण गरिदिएकाले सबैले मन पराउने गरको उनको दाबी छ ।  

एडभेन्चर मन पर्नेका लागि उपयुक्त गन्तव्य हो । फरक खालको भौगोलिक अवस्थाले पनि आन्तरिक पर्यटकको रोजाइ बनेको छ । स्थानीय सरकारले आन्तरिक पर्यटकलाई लक्षित गरेर सेल्फी डाँडासम्म सहजै पुग्न सक्नेगरी बाटो निर्माण गरेको छ । प्रतीक्षालय बनेको छ । खानेपानी, शौचालय निर्माण गरको छ । बुद्धको मूर्तिसमेत राखिएको छ । रेलिङ निर्माण गरेर त्यहाँ पुग्ने पर्यटकलाई सुरक्षित गराइएको छ । ‘दुवैतर्फ ठूलो भीर भएकाले यसमा सुरक्षाको प्रबन्ध गर्नैपर्ने अवस्था छ,’ स्थानीय सञ्जय पाँडे मगरले भने, ‘जे काम भएका छन् अझै धेरै गर्न बाँकी छ जस्तो लाग्छ । सायद बजेट प्राप्त हुनासाथ बिस्तारै गर्ने होला ।’

वडाध्यक्ष पोखरेलका अनुसार चालु आर्थिक वर्षमा लुम्बिनी प्रदेश सरकारले ५० लाख बजेट लिस्नेभीर (सेल्फी डाँडा) क्षेत्रलाई पर्यटकीय विकास गर्न विनियोजन गरेको छ । नजिकैको छत्रदेवालय क्षेत्रदेखि लिस्ने भीरसम्म भौतिक संरचना गर्ने गरी काम अघि बढेको छ । सय वर्षअघिको छत्र देवालयमा विभिन्न भौतिक संरचना बन्ने छ । वडाध्यक्ष पोखरेलका अनुसार सिँढी बनाउने, लिस्नो राख्ने, रेलिङ व्यवस्थित गरिनेछ । छत्रदेवालयमा पिकनिक स्पट निर्माण, शौचालय, झुला, बाघ, मृगका मूर्ति बनाउने काम अघि बढेको छ । पौडी पोखरीसमेत बनाउने योजना छ । 

सेल्फी डाँडामा आन्तरिक तथा बाह्य पर्यटकलाई आकर्षित गर्ने गरी स्थानीय सरकारले काम अघि बढाएको उनले बताए । पर्यटक आकर्षित भइरहँदा होमस्टे सञ्चालन गर्दै स्थानीयलाई आयआर्जनसँग जोड्ने योजना बनाउन स्थानीय रामप्रसाद न्यौपानेले बताए । ‘पर्यटकीय गन्तव्य बनाइरहँदा आयआर्जनलाई पनि जोड्न सकियो भने पक्कै यसलाई व्यवस्थित गर्न सकिन्छ,’ उनले भने, ‘पर्यटकीय क्षेत्र बनाउने हो भने यहाँका बासिन्दाले पनि फाइदा लिन सक्छन् ।’ दैनिक ४०/५० जना आन्तरिक पर्यटक र बिदाका दिनमा सयभन्दा बढी पुग्ने गर्छन् ।