बजेट अभाव देखाउने नगरपालिकाले जनप्रतिनिधिका लागि भने सुविधासम्पन्न सवारी किनेको भन्दै स्थानीयले विरोध जनाएका छन्
परासी — पश्चिम नवलपरासीको सुनवल नगरपालिकाले एकैपटक दुईवटा स्कारपियो खरिद गरेको छ । जनप्रतिनिधि र कार्यालय प्रयोजनका लागि भन्दै नयाँ सवारी खरिद गरिएको हो ।
सरकारले अनावश्यक खर्च कटौती र अत्यावश्यक बाहेक अन्य अवस्थामा सवारीसाधन खरिद नगर्ने नीति लिएको समयमा नगरले सवारी खरिद गरेपछि चौतर्फी विरोध भएको छ । बजेट अभाव देखाउने नगरपालिकाले जनप्रतिनिधिका लागि भने सुविधा सम्पन्न सवारी किनेको भन्दै स्थानीयले विरोध जनाएका छन् । सामाजिक सञ्जालमा जनप्रतिनिधिको चर्को विरोध भएको छ ।
नगरले केही दिनअगाडि ‘क्लासिक एस मोडलको’ दुई वटा स्कोरपियो १ करोड २२ लाखमा खरिद गरेको हो । नगरपालिकाका प्रवक्ता कृष्णप्रसाद बगालेका अनुसार पहिला कार्यपालिका बैठकबाट गाडी किन्ने निर्णय गरेकाले कार्यालय प्रयोजनको लागि खरिद गरेको बताए । नगरमा दमकल अत्यावश्यक रहेको बताउँदै बगालेले दमकल खरिद गर्ने विषयमा पनि छलफल भइरहेको बताए ।
गत माघमा सुनवल नगरापलिका-१२ भुमहीमा टायर गोदाममा आगलागी हुँदा लाखौंको क्षति पुगेको थियो । यसअघिका वर्षमा पनि नगरमा आगलागी हुँदा छिमेकी पालिकाबाट दमकल बोलाउनुपर्दा क्षति बढी हुने गरेको भन्दै नगर प्रमुख विमला अर्यालले दमकल खरिद गर्ने घोषणा गरेकी थिइन् । तर, अहिले दमकलको साटो सुविधा सम्पन्न सवारी किनेपछि चौतर्फी विरोध भएको हो ।
प्रमुख प्रशासकीय अधिकृत शेषकान्त पौडेलेले नगरसभाबाट सवारीसाधन खरिदका लागि बजेट विनियोजन गरेअनुसार बजेट कार्यान्वयमा ल्याएको बताए । 'अन्य पालिकाले पनि सवारी खरिद गरेका छन्, यो नियमित प्रक्रिया हो । कानुनसम्मत भएका कामलाई अतिरञ्जित गर्न आवश्यक छैन,' पौडेलले भने ।
सवारीसाधन खरिदको विषयमा उपप्रमुख सूर्यप्रसाद दुबेले पनि असन्तुष्टि जनाएका छन् । अर्थ मन्त्रालयले नयाँ सवारी, तालिम, फर्निचरजस्ता योजना र काममा खर्च नगर्न पत्रचार गरेको थियो ।
