रोल्पा — वैदेशिक रोजगारीको सिलसिलामा दुबईमा कार्यरत हुँदा मृत्यु  भएका रोल्पाका एक जनाको नेपाली श्रमिकहरूको पहलमा दुबईमा नै शुक्रबार दाहसंस्कार गरिएको छ। त्यहाँको एक कम्पनीमा कार्यरत रोल्पाको गंगादेव गाउँपालिका-३ बडाढुंगा निवासी झनकबहादुर खत्रीको गत चैत २५ मा किटानुको संक्रमणले न्यून रक्तचाप हुने अवस्था (सेप्टिक शक) को कारणले मृत्यु भएको थियो। 

दुबईस्थित रोल्पाली सेवा सामाजका अध्यक्ष दिल पुनका अनुसार पारिवारिक सहमति र मागबमोजिम खत्रीको दुबईमा नै अन्त्येष्टि गरिएको हो। उनले खत्रीको मृत्यु पछि सम्पूर्ण कागजात प्रक्रिया मिलाउन करिब २ साता समय लागेको बताए ।

करिब १० वर्षअघि वैदेशिक रोजगारीको सिलसिलामा दुबईमा पुगेका खत्री घर फर्केका थिएनन्। 'मृत्युको खबर पाएपछि परिवारले आर्थिक अवस्था कमजोर भएको र उतै अन्त्येष्टि गर्न माग गरेका थिए। त्यसै अनुसारको सिफारिसपत्र काठमाडौंस्थित कन्सुलर विभागमा पठाइएको थियो,' गंगादेव-३ का वडाध्यक्ष लोकमान वलीले भने। ५१ वर्षका मृतक खत्रीको शव नेपालस्थित घरमा नल्याई उतै अन्त्येष्टि गर्न उनकी श्रीमती रिसभी खत्री, छोराहरु भूपेन्द्र खत्री र प्रकाश केसी, छोरी सीता केसी र बुहारी रीता घर्ती केसीले मन्जुरीनामा दिएका थिए।