अर्घाखाँची — दुई दिनसम्म सञ्चालन भएको ‘पाणिनि तपोभूमि सम्मेलन–२०८१’ सातबुँदे घोषणपत्र जारी गर्दै सम्पन्न भएको छ । संस्कृत व्याकरणको रचनास्थल पाणिनि गाउँपालिका–१ र २ को संगमस्थान पणेनास्थित तपोभूमिमा आयोजित सम्मेलनको प्रधानमन्त्री केपी शर्मा ओलीले बुधबार उद्घाटन गरेका हुन् ।

विहीबार दिनभर चारवटा कार्यपत्रमा छलफलपछि सातबुँदे घोषणपत्र जारी गरिएको हो । बुटवलका पत्रकार तथा लेखक डीआर घिमिरेको संयोजकत्वमा तयार पारिएको घोषणपत्रमा पाणिनि व्याकरण र संस्कृत भाषा प्रवर्द्धनका लागि गुरुकुल शिक्षा सञ्चालन गर्नुका साथै संस्कृत भाषा र व्याकरणको अध्ययनलाई आधुनिक शिक्षा प्रणालीमा समेट्नका लागि नेपाल सरकारलाई अनुरोध गर्ने उल्लेख छ ।

राष्ट्रिय तथा अन्तर्राष्ट्रिय स्तरका संस्कृत तथा भाषा विज्ञान अनुसन्धानकर्ताहरूसँग सहकार्य गरी अध्ययन तथा अनुसन्धान केन्द्रको स्थापना र सञ्चालनका लागि संस्कृत विश्वविद्यालयसँग सहकार्य गरिने पाणिनि गाउँपालिका प्रमुख प्रशासकीय अधिकृत रोमनाथ न्यौपानेले बताए । 

पाणिनि क्षेत्र परापूर्वकालदेखि साधना, तप र सृजनास्थल भएकाले साधना तथा तपस्थल एवं मानव कल्याणमा प्रभाव पार्न सक्ने गरी अनुसन्धान र सृजनाका लागि पूर्वाधारको व्यवस्था गरिने पनि घोषणापत्रमा उल्लेख छ । 

पाणिनि तपोभूमिको वरपर दुर्वासा मुनिको आश्रम छ । महर्षि देवदत्तकी पुत्री प्रसिद्ध रुरु कन्याको तपस्थल रुरु क्षेत्र छ । प्रख्यात् कालीगण्डकी नदीको संगम छ । यसै तपोभूमिको पश्चिम भागमा रावणले नाचेर शिवलाई सन्तुष्ट पारेको ठाउँ नर्तनाचल छ । नर्तनाचलमै ऐतिहासिक सुपा देउराली मन्दिर र दक्षिणी भागमा रामले वाण हानेर पहरो फोरेर पानी निकालेको बांणगंगा नदी छ ।