गुल्मी — गुल्मीमा विद्युत्को तार सर्ट भई आगलागी हुँदा दुई तले कच्ची गोठसहित ७ सय कुखुरा जलेर नष्ट भएका छन् ।
जिल्लाको मालिका गाउँपालिका वडा नम्बर ६ अर्जैका डिलाराम अर्यालको टिनको छानो भएको उक्त गोठमा अचानक शनिबार राति साढे १२ बजे आगलागी भएको जिल्ला प्रहरी कार्यालय गुल्मीका सूचना अधिकारी प्रहरी नायब उपरीक्षक गंगाबहादुर सारुले जानकारी दिए ।
प्रहरीका अनुसार ७ सय लेयर्स कुखुरासहित ढुङ्गामाटोले बनेको टिनको छानो भएको कच्ची गोठ, गोठमा राखिका दाना, धान र मकै जलेर पूर्ण रुपमा नष्ट भएका छन् ।
आगलागीपछि प्रहरी त्यस स्थानमा खटिएको थियो । आगो डेढ घण्टापछि पौने दुई बजेको समयमा नियन्त्रणमा आएको थियो । समग्रमा भएको आर्थिक क्षतिको विवरण भने अझै प्रहरीसँग नआएको सूचना अधिकारी सारुले बताए ।
आगलागी पीडित डिलाराम अर्यालका छोरा कमल अर्यालले सबै गरी करिब १५ लाख रुपैयाँ भन्दाबढी क्षति भएको दाबी गरे । अण्डा दिन तयार रहेका सात सय लेयर्स कुखुरा सबै जलेर पूर्ण रुपमा नष्ट भएको अर्यालले बताए ।
अहिले जलेको गोठ यसअघि घरकै रुपमा रहेको तर अहिले नयाँ अर्को बनाएर सरेकोमा समान सबै पुरानैमा रहेकोले सबै जलेर नष्ट भएको उनले गुनासो गरे ।
