गुल्मी — नेपाल वायु सेवा निगमको तथ्यांकमा देशमै धेरै यात्रुको चाप रहेको गुल्मीको रेसुंगा विमानस्थल बन्द भएको तीन महिनापछि पुनः सञ्चालनमा आएको छ । 

यहाँ उडान भर्दै आएको नेपाल वायुसेवा निगमसँग भएका दुईवटा ट्विनअटर विमान ग्राउन्डेड भएपछि हवाई सेवा बन्द भएको थियो ।

यहाँ सातामा ४ वटासम्म उडान हुने गरेको थियो । सोमबारदेखि पुनः उडान भएको नेपाल वायुसेवा निगम रेसुंगा स्टेसन प्रमुख सुमन थापाले बताए । ‘साताको चार वटासम्म उडान हुँदा पनि प्यासेन्जर फ्लो धेरै हुने हाम्रो विमानस्थल भोजपुरपछि देशमै सबैभन्दा राम्रो मध्येको थियो,’ उनले भने, ‘केही समय डोमेस्टिक फ्लाइटका दुई ट्विनअटर इन्जिनको साइकल सकिएर ग्राउन्डेड भएपछि बन्द थियो, अब आजदेखि पुनः सुरु भयो ।’

थापाका अनुसार  १९ सिट क्षमताको विमान सधैं भरिभराउ हुने गर्छ । विमानले काठमाडौंबाट बिहान ६ः३० बजे र रेसुंगा विमानस्थलबाट बिहान ७ः३० बजे उडान गर्दै आइरहेको छ । निगमले काठमाडौंबाट रेसुंगाका लागि ७ हजार ५ सय र रेसुंगाबाट काठमाडौंका लागि ७ हजार ३ सय भाडादर निर्धारण गरेको छ । विमानस्थलमा दिउँसोको समयमा अत्यधिक हावाको चाप हुने भएकाले बिहानको समयमा मात्र उडान गरिँदै आएको छ । 

निर्माण सुरु भएको १६ वर्षपछि २०८० वैशाख २९ गतेबाट नियमित उडान सुरु भएको विमानस्थलमा हालसम्म ९१ वटा उडान भएका छन् । गुल्मीबाट १ हजार १ सय ६९ जना र काठमाडौंबाट १ हजार १ सय २ जना यात्रुले यात्रा गरेको विमानस्थलले जनाएको छ । सो अवधिमा करिब १ करोड ६० लाखजति आम्दानी भएको विमानस्थलका स्टेसन प्रमुख थापाले जानकारी दिए ।