नेपालगन्ज — जिल्ला भूमि आयोगले पूर्णता पाएसँगै बाँकेको कोहलपुरमा रोकिएका निस्सा वितरण तथा जग्गा नापजाँचको कामलाई तीव्रता दिइएको छ ।
कोहलपुर नगरपालिका नगरप्रमुख पूर्णप्रसाद आचार्यले आफ्नै नेतृत्वको स्थानीय सरकारले भूमिहीन दलित, भूमिहीन सुकुम्बासी र अव्यवस्थित बसोबासीहरुलाई लालपूर्जा वितरण गर्ने योजनाका साथ कामलाई तीव्रता दिएको बताए ।
‘सरकार परिवर्तनसँगै आयोग भंग भयो । हाम्रो काम पनि बीचमा रोकियो । अहिले भूमि आयोगले पूर्णता पाएको छ । कामहरु पुनः सुरु भएका छन्,’ नगर प्रमुख आचार्यले भने, ‘निस्सा वितरण र जग्गा नापजाँचको कामलाई पूर्णता दिएलगत्तै जग्गाधनी लालपूर्जा वितरणको काम सुरु गर्ने छौं ।’
वडा नम्बर ७ का वडाध्यक्ष ठग्गा थारुले भूमिहीन समस्यालाई अब दीर्घकालीन रुपमा समाधान गर्नेगरी काम भइरहेकाले सबै वडाबासीलाई सहयोगको आग्रह गरे । उक्त वडामा ७८९ वटा निस्सा वितरण गरिने छ । निस्सा वितरणपछि जग्गा नापजाँचको काम सुरु गरिने अमिन गोविन्द केसीले बताए ।
कोहलपुर नगरपालिकाका १५ वटा वडामध्ये वडा नम्बर ६ बाहेक अन्य सबै वडामा निस्सा वितरण र जग्गा नापजाँचको काम करिब पूरा भइसकेको छ । कोहलपुर नगरपालिकामा ५९८ भूमिहीन दलित, ८५० भूमिहीन सुकुम्बासी तथा १६ हजार ७०० घरधुरी अव्यवस्थित बसोबासी रहेका छन् ।
वडा नम्बर १ मा जग्गा नापजाँचसँगै फिल्ड बुक तयार भइ जग्गाधनी पूर्जा वितरणको अन्तिम तयारी समेत भइसकेको छ । ७ दिनको हकदाबीसम्बन्धी सूचना पूरा भएर भूमिहीन दलित र भूमिहीन सुकुम्बासी गरी १४१ जनालाई जग्गाधनी प्रमाणपत्र वितरणको अन्तिम तयारीमा रहेको पनि केसीले बताए ।
यस्तै वडा नम्बर २ मा पनि फिल्डबुक तयारी अवस्थामा छ । कोहलपुर नगरपालिका वडा नम्बर १ मा भूमिहीन दलित, भूमिहीन सुकुम्बासी र अव्यवस्थित बसोबासी गरी १ हजार ३६५ घरधुरीको १ हजार ४६ कित्ता जग्गा नापजाँच भएको फिल्ड सहायक प्रभुमान थारुले जानकारी दिए ।
वडा नम्बर २ मा ३ हजार १०२ घरधुरीको ३ हजार ५०० कित्ता, वडा नम्बर ३ मा १ हजार ६६६ घरधुरीको २ हजार ६०० कित्ता, वडा नम्बर ४ मा ६७१ घरधुरीको १५३ कित्ता नापजाँच भएको छ ।
वडा नम्बर ५ मा ९६८ घरधुरीको १ हजार ९७ कित्ता, वडा नम्बर ८ मा ५१६ घरधुरीको ९०० कित्ता, वडा नम्बर १० मा एक हजार ५ घरधुरीको एक हजार १५० कित्ता, वडा नम्बर ११ मा एक हजार २०० घरधुरीको १ हजार १० कित्ता, वडा नम्बर १२ मा १ हजार ६६० घरधुरीको २ हजार ८०० कित्ता, वडा नम्बर १३ मा १ हजार २२५ घरधुरीको ७०० कित्ता, वडा नम्बर १४ मा ८०० घरधुरीको १ हजार ११ कित्ता र वडा नम्बर १५ मा ९५० घरधुरीको २ हजार ५०० कित्ता जग्गा नापजाँच गरिएको छ ।
