कपिलवस्तु — ऐतिहासिक तथा पुरातात्विक बुद्धस्थलमा निग्रोधाराम उत्सव मनाइएको छ । बौद्ध धर्मावलम्बीको आस्था र महत्त्वपूर्ण स्थल निग्रोधारामको पवित्रता उजागर गरी पर्यटकीय गन्तव्य बनाउने उद्देश्यले बिहीबार उत्सव गरिएको हो ।

थेरबाद र महायानी परम्पराअनुसार भिक्षु, लामागुरुले च्यान्टिङ गरी उत्सव उद्घाटन गरेका हुन् । 

रेडियो टुरिजम र गच्छामि मिडिया ग्रुपद्वारा आयोजित उत्सवका प्रमुख अतिथि अखिल नेपाल भिक्षु महासंघका पूर्वअध्यक्ष भिक्षु मैत्री महास्थवीरले बुद्धले बुद्धत्व प्राप्त गरेपछि आफ्ना मातापितालाई पहिलो पटक भेट्न राजधानी आउँदाको खुसीयाली क्षण स्मरण गर्न आयोजित उत्सव भिक्षु भिक्षुणीका लागि निकै महत्त्वपूर्ण भएको बताए ।

‘यसलाई बिस्तारै स्थापित पर्यटकीय गन्तब्य बनाउनेतर्फ लाग्नु पर्नेछ,’ उनले भने, ‘सबैलाई दया, माया, करुणा र आस्था जगाउने ठाउँका रुपमा निग्रोधाराम रहेकाले बौद्ध धर्मावलम्बीका लागि एउटा छुट्टै महत्त्व छ ।’  

कपिलवस्तु नगरपालिका–२, कुदानस्थित निग्रोधाराममा बुद्धले ज्ञानप्राप्त गरेपछि पहिलो पटक राजधानी कपिलवस्तु आउँदा फागुन पूर्णिमाका दिन मातापितासँग निग्रोधाराममा भेटघाट गरेका थिए । उक्त ऐतिहासिक क्षणको महिमा फैलाउन निग्रोधाराम उत्सव गरिएको हो ।