विश्वका ३७ देशका १ सय ३७ स्थानीय र प्रदेश सरकारले आवेदन दिएकामा पहिलो चरणमा उत्कृष्ट ४० छनोट
तिलोत्तमा — रुपन्देहीको तिलोत्तमा नगरपालिका नागरिक सहभागितामा असल अभ्यास गर्ने विश्वभरका स्थानीय तथा प्रदेश सरकारबीचको प्रतियोगिताको प्रारम्भिक सूचीमा पर्न सफल भएको छ ।
अर्जेन्टिनाको इन्टरनेसनल अब्जरभेटरी अन पार्टिसिपेसन (ओआईडीपी) संस्थाले गर्ने २४औं संस्करणको अवार्डका लागि तिलोत्तमा प्रारम्भिक सूचीमा परेको नगर प्रमुख रामकृष्ण खाँणले बताए । उनका अनुसार अवार्डका लागि विश्वका ३७ देशका १ सय ३७ स्थानीय र प्रदेश सरकारले आवेदन दिएकामा पहिलो चरणमा तिलोत्तमा उत्कृष्ट ४० मा छनोट भएको हो ।
ओआईडीपीले आफ्नो वेबसाइटमार्फत विभिन्न पाँच विषयमा आवेदन माग गरेकामा तिलोत्तमा जनसहभागितामा सञ्चालित सरसफाइ तथा हरियाली प्रवर्द्धन अभियानअन्तर्गत प्रारम्भिक सूचीमा परेको उनले जानकारी दिए ।
छनोट भएका ४० स्थानीय र प्रदेश सरकारबीच अनलाइन भोटिङको ५० अंक र निर्णायकको मूल्याङ्कनको ५० अंकका आधारमा आगामी मे महिनाको २१ देखि २३ सम्म अर्जेन्टिनाको कोर्डोबामा हुने ओआईडीपी कन्फेरेन्स (सम्मेलन) मा अवार्ड विजेता घोषणा गरिने ओआईडीपीको वेबसाइटमा उल्लेख छ ।
तिलोत्तमा प्रारम्भिक सूचीमा परेपछि अनलाइन भोटिङमार्फत मत दिएर जिताउन नेपालभर र विश्वमा रहेका नेपालीलाई नगर प्रमुख खाँणले अपिल पनि गरेका छन् ।
ओआईडीपीले मार्च अन्तिमभित्रै एक हप्ताको अवधि निर्धारण गरी अनलाइन भोटिङ खुला गर्नेछ । अनलाइन भोटिङ गर्दा एक जनाले ५ वटै विषयमा मत दिनुपर्ने अन्यथा मत रद्द हुने नियम रहेको छ । ओआईडीपीको वेबसाइटमै गएर मत दिन सकिनेछ ।
तिलोत्तमा नगरपालिकाले २०७४ सालदेखि हरेक १५ दिनमा जनसहभागितामा सरसफाइ तथा हरियाली प्रवर्द्धन अभियान सञ्चालन गर्दै आएको छ । आठौं वर्षमा निरन्तर चल्दै आएको अभियानको १ सय ४० औं श्रृंखला सम्पन्न भएको नगर प्रमुख खाँणले बताए ।
