बुटवल — लुम्बिनी प्रदेश सरकारले प्रदेशसभाको पाँचौं (हिउँदे) अधिवेशन अन्त्य गर्ने निर्णय गरेको छ । सरकारको मंगलबार बसेको बैठकले मंगलबार रातिदेखि अधिवेशन अन्त्यका लागि प्रदेश प्रमुख कृष्णबहादुर घर्ती मगरसमक्ष सिफारिस गर्ने निर्णय गरेको हो ।
सरकारको निर्णयसँगै प्रदेश प्रमुख कृष्णबहादुर घर्तीले फागुन ६ गते मंगलबार राति १२ बजेपछि प्रदेशसभाको पाँचौं अधिवेशन अन्त्य भएको सूचना प्रदेशसभामा पठाएको प्रदेश प्रमुखको कार्यालयका सूचना अधिकारी सुरेश भुसालले बताए । पाँचौं अधिवेशन पुस १६ देखि सुरु भएको थियो । धिवेशनले दुई विधेयक पारित गरेको छ ।
प्रदेशसभाका सचिव दुर्लभकुमार पुनका अनुसार ११ वटा बैठकले लुम्बिनी अनुसन्धान तथा प्रशिक्षण प्रतिष्ठान र आर्थिक कार्यविधि तथा वित्तीय उत्तरदायित्व विधेयक पारित गरेको छ । अधिवेशनको सोमबारको ११ औं बैठकमा प्रधानमन्त्री केपी शर्मा ओलीले विशेष सम्बोधन गरेका थिए ।
त्यस्तै पाँचौं अधिवेशनले यसअघि प्रदेश प्रमुख कृष्णबहादुर घर्तीमगरले प्रमाणीकरण नगरी सन्देशसहित फिर्ता पठाएका दुई विधेयक पनि हुबहु पारित गरेको छ ।
अधिवेशनको दोस्रो बैठकले प्रदेश प्रमुख घर्तीले फिर्ता पठाएका प्रदेश निजामती सेवा ऐन २०८० लाई संशोधन गर्न बनेको विधेयक र स्थानीय निजामती सेवाको गठन, संचालन र सेवाका सर्त सम्बन्धमा व्यवस्था गर्न बनेको विधेयक पुनः पारित गरेको थियो ।
लुम्बिनी प्रदेशमा अहिलेसम्म ८४ वटा कानुन निर्माण भएका छन् । प्रदेशसभाको पहिलो कार्यकालले ७२ वटा र दोस्रो कार्यकालको अधिवेशनसम्ममा १२ वटा कानुन पारित भएको प्रदेशसभा सचिव पुनले बताए ।
