रोल्पा — लुम्बिनी प्रदेशको पर्यटन नीति निर्माण गर्ने सम्बन्धमा रोल्पाका सरोकारवालाबीच सदरमुकाम लिबाङमा मंगलबार अन्तरक्रिया भएको छ ।

राप्ती उपत्यका देउखुरीस्थित लुम्बिनी प्रदेश सरकारको उद्योग, पर्यटन तथा यातायात मन्त्रालयको आयोजनामा रोल्पासहित प्युठान, दाङ, रुकुम पूर्व लगायतका जिल्लाका जनप्रतिनिधि, व्यवसायी, पत्रकार, पर्यटन अभियन्ता लगायतको उपस्थितिमा पर्यटन नीति निर्माणबारे छलफल र बहस भएको हो। मन्त्रालयका पर्यटन महाशाखा निर्देशक कृष्ण गौतमको अध्यक्षतामा भएको कार्यक्रममा प्रदेशका १२ वटै जिल्लाभित्रका पर्यटकीय स्थल र तिनको महत्त्वबारेमा समेत छलफल भएको थियो।

प्रदेशअन्तर्गत सबैभन्दा उच्च हिमाल रुकुम पूर्वको सिस्ने हिमशृंखलादेखि तराई/मधेसका प्रचलित एवं संभावित पर्यटकीय स्थानको पहिचान, महत्त्व र प्रवर्द्धनसहित विकास गर्ने सम्बन्धमा समेत अन्तरक्रिया भएको हो। लुम्बिनी प्रदेशमा रहेका पर्यटकीयस्थलबारे नीति निर्माणमा खटिएका विज्ञहरु पूर्वसहसचिव रमेशकुमार अधिकारी र अनुसन्धानकर्ता डा. केशव आचार्यले प्रस्तावना प्रस्तुत गरेका थिए। प्रस्ताव पेस गर्दै अधिकारीले भने, 'पर्यटन क्षेत्रको पहिचान र विकासमा सबै सरोकारवाला र स्थानीय सरकारको समेत समान सरोकार र भूमिका हुने गरेर नीति बनाउनेतर्फ अघि  बढेका छौं।' 

अर्का अध्येता डा आचार्यले प्रदेशको तराईदेखि हिमालसम्मका जनताबीच पर्यटन उद्योगको विकास र आम्दानीको महत्त्वलाई बढाउन सबै पक्ष लाग्नुपर्ने बताए । पर्यटन नीति निर्माणबाट यस क्षेत्रमा विकास र आर्थिक  गतिविधिमा वृद्धि हुने लुम्बिनी प्रदेश योजना आयोगका सदस्य डा सुदन वलीले बताए । उनले पर्यटन क्षेत्रको संभावना र विकासबारे बहस गरेर आर्थिक क्षेत्रको पनि बिकास गर्नुपर्ने बताए।

प्रदेशमा गौतम बुद्धको जन्मस्थल लुम्बिनी हुनु आफैमा गौरवको कुरा भएको कार्यक्रमकी मुख्य अतिथि प्रदेशसभा सदस्य यमुना रोका तामाङले बताइन् । उनले बाँके र बर्दिया राष्ट्रिय निकुञ्जका साथै ढोरपाटन सिकार आरक्षण क्षेत्र समेत हुनु पर्यटनको विकासमा महत्त्व वृद्धि हुने बताइन् । सरकारले पहिलोपटक पर्यटन नीति निर्माण थालेकोमा राम्रो भएको उल्लेख गर्दै उनले सबै क्षेत्र र समुदायको पक्षमा नीति बनाउन निर्देशन पनि दिइन्।