दाङ — नेपाली कांग्रेसका सभापति एवं पूर्व प्रधानमन्त्री शेरबहादुर देउवा शनिबार दाङ आएका छन् । दंगीशरण गाउँपालिका–३ चखौरास्थित थारु सङ्ग्रहालयमा शनिबारदेखि सुरु हुने २ दिने प्रदेशस्तरीय थारु सांस्कृतिक तथा रैथाने खाना महोत्सव  उद्घाटन गर्न देउवा यहाँ आएका हुन् ।

महोत्सवसँगै महतवा, बरघर, भलमन्सा संघको अविधेशन पनि हुन थालेको छ ।

थारु भाषा, कला, संस्कृतिको संरक्षण र प्रवर्द्धन गर्ने उद्देश्यले दुई दिने महोत्सव आयोजना गरिएको महतवा, बरघर, भलमन्सा संघका केन्द्रीय अध्यक्ष एवं लुम्बिनी प्रदेशका पूर्व मुख्यमन्त्री डिल्लीबहादुर चौधरीले बताए । 

‘हाम्रो संस्कृति, हाम्रो सान-संस्कृति संरक्षणले बढ्छ देशको मान’ भन्ने मूल नाराका साथ कार्यक्रमको आयोजना गरिएको उनले जानकारी दिए । महोत्सवमा दाङ र नवलपरासीको बर्का नाच, कैलालीको मुङग्रहवा र चितवनको थारु नाच प्रस्तुत हुनेछन्  । महोत्सवमा सांस्कृतिक प्रतियोगिता एवं थारु लगायत  विभिन्न जातजातिका रैथाने परिकारको प्रदर्शनी हुने चौधरीले बताए । थारु परिकारमा ढिक्री, अनदी चामलको भात, रोटी, अनदीको झोल, सुँगुरको सेकुवा, सिन्कीका परिकार, आलुको अचार लगायत रैथाने परिकार रहने उनले जानकारी दिए ।