पाल्पा — विभिन्न चार बुँदे माग राखेर रेजिडेन्ट र इन्टर्न चिकित्सकको आन्दोलनले पाल्पास्थित लुम्बिनी मेडिकल कलेज प्रभासमा सेवा प्रभावित बनेको छ । उनीहरूले मंगलबार बिहान ९ बजेदेखि ५ बजेसम्म सेवा बहिष्कार गरेका थिए । बुधबार पनि बिहान ९ बजेदेखि हातमा कालोपट्टी बाँधेर प्रदर्शन गरेका छन् । 

इमरजेन्सी सेवाबाहेक अन्य काममा चिकित्सकले सेवा प्रवाह नगर्दा मेडिकल कलेजकै सेवामा असर पुगेको छ । लुम्बिनी मेडिकल कलेजमा रेजिडेन्ट र इन्टर्न गरी १ सय २४ बढी चिकित्सक रहेका छन् । स्वास्थ्यकर्मीका लागि सुरक्षित कार्यस्थल संघर्ष समितिले राखेको आन्दोलनअन्तर्गत मेडिकल कलेजमा व्यानर र प्लेकार्डसहित प्रदर्शन गरेको रेजिडेन्ट चिकित्सक डा. दीपक कँडेलले बताए । 

चिकित्सकहरूले स्वास्थ्य तथा जनसंख्यामन्त्री र शिक्षा विज्ञान तथा प्रविधिमन्त्रीले संयुक्त जारी गरेको सिफारिस तत्काल खारेज गर्नुपर्ने, सम्पूर्ण इन्टर्न, एमडी, एमएस, एमडीएस, एमसीएच रेजिडेन्टको पारिश्रमिक न्यूनतम सरकारीसरह कायम गर्न माग गरेका छन् । त्यस्तै पीजी कार्यक्रम पूर्णतया शुल्करहित र बोन्डरहित गर्न माग गरिएको छ ।