रुकुम पूर्व — रुकुम पूर्वको सिस्ने गाउँपालिका-१ र २ तथा पुथाउत्तरगंगा गाउँपालिका-७ र १४ का सर्वसाधारण आवागमन गर्ने भालखाप्चेस्थित मूल बाटो गत बर्खामा भत्किएपछि सानी भेरी नदीमा काठको अस्थायी साँघु र बाटो बनेपछि तत्काललाई सहज भएको छ । साबिकको बाटो बनाउन ठूलो लगानी लाग्ने भएपछि यसो गरिएको हो ।

सिस्ने गाउँपालिकाको कुल १२ लाख लगानीमा अस्थायी बाटो र साँघु बनाइएको पालिका अध्यक्ष कृष्ण रेग्मीले बताए । ‘पहिलाको बाटो भत्किएर त्यहाँ नयाँ बाटो बनाउन तत्काल सम्भव नभएकाले यसो गरिएको हो,' उनले भने, ‘स्थायी बाटो बनाउनका लागी हामीले १ करोडको लागत स्टमेटसहित संघीय सरकार समक्ष माग गरेका छौँ । उक्त बजेट नआएमा पुरानै समस्या दोहोरिने जोखिम छ ।’ 

जिल्ला सदरमुकाम रुकुमकोटबाट सिस्नेका १, २ र पुथाउत्तरगंगा गाउँपालिकाका ७, ८, ९ र १४ वडाका बासिन्दा आवतजावत गर्ने मूलबाटो अन्तर्गत पुथाउत्तरगंगाको–१४ स्थित भालुखाप्चेको भीरमा गत साउनमा पहिरो गएको थियो । यसपछि डोरीको सहायतामा आवतजावत गर्न थालिएको थियो भने पछि उक्त बाटोलाई केही सहज बनाइएको थियो । तर उक्त बाटोमा जोखिमपूर्ण भएकाले नदीको बहाव घटेपछि नदीकै छेउछेउबाट अस्थायी बाटो बनाएर सिधै सिस्ने-२ मा जोड्न साँघु बनाइएको हो । 

बर्खा लागेपछि फेरी नदी बढ्ने र यो बाटो नरहने भन्दै सिस्ने–२ का पूर्व वडाध्यक्ष जीवन केसीले यसको स्थायी समाधान खोजिनुपर्नेमा जोड दिए । ‘हामीले सकेको पहल गरिरहेकै छौँ । तर हामीसँगै सरोकारवाला राज्य–सरकार गम्भीर हुनुपर्ने देखिन्छ,’ उनले भने, ‘अहिले बेवास्ता गरियो भने पछि फेरि हाम्रो दुःख बल्झिनेछ ।’