बुटवल — लुम्बिनी प्रदेश सरकारको सोमबार बसेको मन्त्रिपरिषद् बैठकले प्रदेश सचिवहरूको जिम्मेवारी हेरफेर गर्ने निर्णय गरेको छ । मन्त्रिपरिषद्ले सामाजिक मन्त्रालयका सचिव भुपेन्द्र थापालाई युवा तथा खेलकुद मन्त्रालयमा सरुवा गरेको छ ।

सामाजिक विकास मन्त्रालयमा मुख्यमन्त्री तथा मन्त्रिपरिषद् कार्यालयका सचिव अणप्रसाद न्यौपानेलाई पठाइएको छ । त्यस्तै रिक्त रहेको कृषि, भूमि व्यवस्था तथा सहकारी मन्त्रालयमा कृषि विकास निर्देशनालयका प्रमुख यामनारायण देवकोटालाई लगिएको छ । देवकोटा यसअघि पनि कृषि मन्त्रालयका सचिव थिए । कृषि, भूमि व्यवस्था तथा सहकारी मन्त्रालयकी सचिव नम्रता सिंह भ्रष्टाचार मुद्दामा निलम्बन भएपछि सचिव पद रिक्त थियो ।

लुम्बिनी प्रदेशका प्रमुख सचिव महादेव पन्थको पनि गण्डकी प्रदेश सचिवमा सरुवा भएको छ । सचिव पन्थलाई प्रदेश सरकारले बिदाइ गरेको छ । लुम्बिनीमा प्रदेश प्रमुख सचिवमा संघीय सरकारबाट बाबुराम अधिकारी आउने भएका छन् । 

त्यस्तै प्रदेश मन्त्रिपरिषद बैठकले प्यूठान अस्पतालमा कार्यरत डा. विनोद सिंहलाई रोल्पा जिल्ला अस्पताल र डा. ओम अर्याललाई प्यूठान अस्पतालमा सरुवा गर्ने निर्णय गरेको छ ।  मन्त्रिपरिषद् बैठकले गत वर्षको दायित्व भुक्तानी दिन बाँकी मन्त्रालयहरुको बिवरण संकलन गर्ने रकम भुक्तानी गर्ने पनि निर्णय गरेको भौतिक पूर्वाधार विकासमन्त्री भूमिश्वर ढकालले बताए । ‘अघिल्लो वर्ष दायित्व सिर्जना भएको र भुक्तानी दिन बाँकी रहेको प्रमाणित भएको सबै रकम भुक्तानी दिने निर्णय भएको छ,’ उनले भने, ‘त्यसको विवरण सबै मन्त्रालयबाट संकलन गर्ने काम भइरहेको छ ।’ प्रदेश सरकारले गत वर्षको झन्डै ६० करोड भुक्तानी गर्न बाँकी रहेको आर्थिक मामिला तथा योजना मन्त्रालयले जनाएको छ ।