पाल्पा — पाल्पा, गुल्मी र स्याङ्जाको संगम रुरु क्षेत्र रिडीमा लाग्ने माघे संक्रान्ति मेला भर्न मंगलबार बिहानैदेखि श्रद्धालु भक्तजन पुगेका छन् ।
नेपालको चारधाममध्ये एक रुरु क्षेत्र रिडीधाममा हरेक वर्ष माघे संक्रान्तिको अवसरमा तीन दिन धार्मिक मेला लाग्ने गर्छ । मेलाका लागि पाल्पा, गुल्मी र स्याङ्जातर्फ स्टलहरू तयार पारिएको छ । कालीगण्डकी नदीमा नुहाउने र पाल्पाको तानसेन नगरपालिका-१४ अर्गलीमा रहेको ऋषिकेशव मन्दिरमा पूजाआजा गर्ने प्रचलन रहेको छ ।
ऋषिकेशव मन्दिर व्यवस्थापन समितिका अध्यक्ष पर्शुराम भट्टराईका अनुसार तीन वटै जिल्लाले आआफ्नो ढंगले मेला लगाउने तयारी गरेका छन् । पाल्पा जिल्लातर्फ धार्मिक कार्यक्रम भजनकीर्तन, पूजापाठ, भण्डार, दान पुण्यजस्ता कार्यक्रम हुने भट्टराईले बताए ।
पाल्पा, गुल्मी, स्याङ्जाबाहेक अर्घाखाँची, पर्वत, बागलुङ, म्याग्दी, रुकुम, रोल्पा, प्युठान, रुपन्देही, नवलपरासी, कपिलवस्तु, दाङलगायतका जिल्लाबाट रुरु रिडीस्थित कालीगण्डकी नदीमा स्नान गर्न आउने गर्छन् । भक्तजनहरूले कालीगण्डकीमा नुहाएपछि पाल्पातर्फको ऋषिकेश मन्दिरमा पूजा गर्ने परम्परा रहेको अध्यक्ष तानसेन नगरपालिका-१४ का वडाध्यक्ष शोभाखर भट्टराईले बताए । उनका अनुसार माघे संक्रान्ति मेला भर्न पुगेका श्रद्धालुलाई खिचडी खुवाउने कार्यक्रमसमेत राखिएको छ ।
गुल्मीतर्फ उद्योग वाणिज्य संघ र रुरु फ्रेन्डस् क्लब लगायतका संघसंस्थाले ६ दिने बृहत् सांस्कृतिक कार्यक्रमको आयोजना गरेको जनाएका छन् । रुरु क्षेत्र रिडीमा आउने भक्तजनलाई मनोरञ्जन प्रदान गर्ने गरी हरेक वर्ष मेलाको आयोजना गर्दै आएको रुरु फ्रेन्डस क्लबले जनाएको छ । स्याङ्जातर्फ वडाध्यक्ष कप भलिबल प्रतियोगिताको आयोजना गरिएको आयोजकले जनाए ।
रुरु क्षेत्रमा सेन वंशीय राजा मणिमुकुन्द सेनले काली गण्डकी नदीमा स्नान गर्दा ऋषिकेशवको साक्षात् मूर्ति फेला पारेको र सोही मूर्तिलाई प्रतिस्थापन गरेको किंवदन्ती छ । त्यसैले यहाँ आउने भक्तजनले कालीगण्डकी नदीमा स्नान गरेपछि भगवान् ऋषिकेशवको दर्शन गर्ने र दानपुन्य कार्यमा सहभागी हुने गर्छन् ।
रुरु क्षेत्रमा मेला भर्न जानेहरूले घरमै उत्पादन गरेका वस्तुको खरिद बिक्री गर्ने गर्छन् । रुकुमपूर्वबाट भेडाको ऊनबाट बनेका काम्बल, ढाका, राडी, पाखी, आस कोट, स्वेटरसमेत बिक्रीका लागि ल्याएका छन् । मेलामा फलफूल, तरकारी, चोयाबाट बनेका सामग्री, फलामका सामग्री, ओखर, टिमुर, गुँड, खाद्य वस्तु बिक्रीका लागि ल्याएको स्थानीय चुरामणि तिमिल्सेनाले बताए ।
