बर्दिया — खाद्य तथा व्यवस्था व्यापार केन्द्र राजापुरमा गत कार्तिक महिनादेखि सुरु भएको धान खरिद पुस तस्रो सातासम्म ३८ प्रतिशतमात्रै छ । यस वर्ष धान खरिदको एक लाख क्वीन्टल रहेको थियो । व्यापार केन्द्र, राजापुरका मुख्य शाखा प्रमुख राम कमल पाण्डेका अनुसार पुस २४ गतेसम्म धान खरिद करिब ३८ हजार क्वीन्टल खरिद भएको छ ।

'धान खरिद लक्ष्यमा पुग्न सक्ने अवस्था छैन,’ उनले भने, ‘मुस्किलले एक सय क्वीन्टल खरिद हुन सक्छ ।' यस वर्ष बर्दियामा धानको उत्पादन बढेको एकिकृत कृषि तथा पशुपंक्षी विकास कार्यालयले जनाएको छ ।

जिल्लामा ५१ हजार १ सय हेक्टर क्षेत्रफलमा धान खेती हुने गर्छ । जसबाट यसवर्ष करिब २ लाख ३५ हजार क्वीन्टल धान उत्पादन भएको छ । कृषि तथा पशुपंक्षी विकास कार्यालयका प्रमुख सागर ढकालले गत वर्ष २ लाख २५ हजार ४ सय ५० क्वीन्टल उत्पादन भएको बताए ।