परासी — शीतलहर बढेपछि पश्चिम नवलपरासीको रामग्राम नगरपालिकाले दाउरा वितरण सुरु गरेको छ । तीन–चार दिनदेखि हुस्सु र शीतलहरले जनजीवन प्रभावित भएपछि सार्वजनिक स्थानमा आगो ताप्न दाउरा वितरण गरिएको हो ।
नगरका मुख्य चोक, बजार क्षेत्र र ग्रामीण भेगमा आगो ताप्नका लागि निःशुल्क रूपमा दाउरा वितरण गरिएको रामग्राम नगरपालिकाका प्रमुख धनपत यादवले बताए ।
सार्वजनिक स्थानमा आगो ताप्न पाउँदा दैनिक मजदुरी गर्ने र विपन्न वर्गका स्थानीयलाई सहज हुने भएकाले नगरका १८ वटा वडाको सार्वजनिक स्थानमा आगो बाल्न दाउरा वितरण गरिएको हो ।
जिल्लाका सातवटै पालिकाले २० लाखदेखि ५० लाख रुपैयाँ विपद् व्यवस्थापनका लागि बजेट विनियोजन गरेको भए पनि सम्भावित विपद्को तर्जुमा गरेर योजना बनाउन नसक्दा र्सासाधारणले समयमा नै राहत र विपद्बाट जोगिन पूर्वतयारी हुन सकेको छैन ।
पूर्वी र पश्चिम नवलपरासीमा शीतलहरका कारण जनजीवन प्रभावित बनेको छ । पश्चिम नवलपरासीमा सोमबारदेखि र पूर्वी नवलपरासीमा बिहीबारदेखि घाम नलागेको र बाक्लो हुस्सुले गर्दा एक्कासि जाडो बढेको छ । जसका कारण जनजीवन प्रभावित बनेको छ ।
अत्यावश्यक बाहेक अरू काममा बाहिर नहिँड्न र न्याना कपडा लगाउन स्थानीय तहका जनप्रतिनिधिले आग्रह गरेका छन् ।
चिसोको कारण दैनिक मजदुरी गर्ने र विपन्न परिवारका मानिस बढी प्रभावित भइरहेका छन् । चिसोका कारण जिल्लाका मुख्य व्यापारिक केन्द्र परासी, सुनवल, बर्दघाट लगायतका बजारमा चहलपहल घटेको छ ।
पूर्वी नवलपरासीको सदरमुकाम कावासोती, दलदले, चोरमारा लगायतका क्षेत्रमा पनि शीतलहरले जनजीवन प्रभावित भएको छ ।
