देउखुरी — लुम्बिनी प्रदेश सभा पाँचौं अधिवेशनअन्तर्गत दोस्रो बैठक आज दिउँसो १ बजेका लागि बोलाइएको छ । उक्त बैठकमा प्रदेश प्रमुख कृष्णबहादुर घर्तीबाट फिर्ता भएको कर्मचारी विधेयक पेश हुँदैछ । मुख्यमन्त्री चेतनारायण आचार्यले सभामा विधेयक सम्बन्धी प्रस्ताव पेश गर्ने सम्भावित कार्यसूची रहेको प्रदेश सभा सचिवालयले जनाएको छ ।

 प्रदेश प्रमुख घर्तीले प्रदेश निजामती सेवा ऐन, २०८० लाई संशोधन गर्न बनेको विधेयक र स्थानीय निजामती सेवाको गठन, सञ्चालन र सेवाका शर्त सम्बन्धमा व्यवस्था गर्न बनेको विधेयक सन्देश सहित फिर्ता पठाएका थिए । यी दुई विधेयक प्रदेश सभाले पास गरेर प्रमाणीकरणका लागि प्रदेश प्रमुखसमक्ष पठाइएको थियो ।

प्रदेश निजामती सेवा ऐन, २०८० लाई संशोधन गर्न बनेको विधेयक भदौ ३१ गते र स्थानीय निजामती सेवाको गठन, सञ्चालन र सेवाका शर्त सम्बन्धमा व्यवस्था गर्न बनेको विधेयक भदौ २७ गते प्रदेशसभाबाट पास भएको थियो । विधेयक प्रदेश प्रमुखले सन्देश सहित असोज २२ गते प्रदेश सभामा फिर्ता पठाएका थिए ।