तिलोत्तमा — लुम्बिनी प्रदेशमा लगानीको प्रचूर सम्भावना रहेको विज्ञले बताएका छन् । बुटवलमा बिहीबार आयोजित ‘नेपालको व्यावसायिक नीति तथा लुम्बिनी प्रदेशमा लगानीका अवसर’ विषयक गोष्ठीमा सहभागी विज्ञले अरु प्रदेशको तुलनामा लुम्बिनीमा लगानीका लागि उपयुक्त सम्भावना र अवसर रहेको बताएका हुन् ।

राजनीतिक अस्थिरता र अस्थिर आर्थिक नीतिका कारण मुलुकमा लगानीको वातावरण बन्न नसकेको भन्दै उनीहरुले राजनीतिक दलको सर्वसम्मतीमा मुलुकको आर्थिक नीति बनाउनु पर्नेमा जोड दिए । त्यस्तै, आर्थिक विकास र समृद्धिका लागि संस्थागत सुशासन अनिवार्य सर्तको रुपमा लागू गर्नुपर्ने उनीहरुको भनाइ छ ।

सीमा नियमनमा कडाई, प्राकृतिक स्रोत साधनको समुचित उपयोग र निर्यात, कृषिको व्यावसायिक उत्पादन, प्रशोधन र बजारीकरणमा राज्यले ध्यान दिनुपर्ने उनीहरुले औंल्याए । 

गोष्ठीले लुम्बिनी प्रदेशमा पर्यटन, कृषि र सूचना प्रविधिको लागि राम्रो सम्भावना रहेको निष्कर्ष निकालिएको पूर्वअर्थसचिव तथा उच्चस्तरीय आर्थिक सुधार सुझाव आयोगका अध्यक्ष रामेश्वर खनाल बताए । गोष्ठीमा सूचना प्रविधि, पर्यटन, स्वास्थ्य, शिक्षा र आर्थिक कोरिडोरको रुपमा लुम्बिनी प्रदेशलाई अगाडि बढाउन सकिने र त्यसका माध्यमबाट आयआर्जन गर्न सकिने विषयमा छलफल भएको थियो ।