तिलोत्तमा — रुपन्देहीको सिद्धार्थनगर नगरपालिकाले अटो, टेम्पो तथा ई-रिक्साजस्ता तीनपांग्रे साधनको नियमन सुरु गरेको छ । नगरको ट्राफिक व्यवस्थापनमा मुख्य चुनौतीका रूपमा देखिएका यी साधनलाई मापदण्डभित्र राखेर सञ्चालन गर्न बुधबारदेखि अभियान नै सुरु गरेको पालिकाका प्रमुख प्रशासकीय अधिकृत जनक थापाले बताए । 

'मापदण्डअनुसार सिद्धार्थनगरमा ५ सय अटो तथा रिक्सा चल्न पाउने प्रावधान छ,' उनले भने, 'सबै सरोकारवालाको सर्वपक्षीय छलफलबाट बिनादर्ता र अव्यवस्थित रूपमा भैरहवा क्षेत्रमा सञ्चालन हुँदै आएका साधनलाई रोक लगाइने निर्णय भएको छ ।'

नगरपालिकाले पटक-पटक सूचना प्रकाशित गरी ४ सय ७३ वटा ई-रिक्सा दर्ता गराएको छ । अब दर्ता भएका ई-रिक्सालाई मात्र नगरभित्र सञ्चालन गर्न दिनका लागि नियमन सुरु भएको हो । जिल्ला ट्राफिक प्रहरी कार्यालय रुपन्देहीको सहकार्यमा नियमन अभीयान सुरु गरिएको उनले जनाए । 'एक हप्तासम्म नियमन गरिने र त्यसपछि अटेर गर्नेलाई कारबाही प्रक्रियामा अगाडि बढाइनेछ,' उनले भने, 'दर्ता भए नभएको सजिलै छुट्याउनका लागि दर्ता भएका ई-रिक्सा चालकलाई पहेलो रगंको हाफ ज्याकेट समेत वितरण गरिएको छ ।'