सीके राउतको पार्टीद्वारा डेढ सय पालिकामा उम्मेदवारी- स्थानीय तह निर्वाचन २०७९ - कान्तिपुर समाचार

सीके राउतको पार्टीद्वारा डेढ सय पालिकामा उम्मेदवारी

सन्तोष सिंह

धनुषा — सीके राउत नेतृत्वको जनमत पार्टीले मुलुकभरका १ सय ५० भन्दा बढी पालिकामा उम्मेदवारी दिएको जनाएको छ । मधेस प्रदेशका ८ वटै जिल्लाका स्थानीय तहसँगै बाँके, बर्दिया, कञ्चनपुर, नवलपरासी, चितवन, उदयपुर, झापालगायतमा समेत उम्मेदवारी दिइएको पार्टीले जनाएको छ । 

‘१२ सयभन्दा बढी वडामा उम्मेदवारी परेको छ तर विवरण पूरै आइसकेको छैन,’ जनमत पार्टी सचिवालय प्रमुख राजेशकुमार मण्डलले भने ।

पार्टी अध्यक्ष राउतले झापादेखि बर्दियासम्म डेढ सय पालिकामा उम्मेदवारी दर्ता गराएको बताए । उनले गठबन्धन र अन्य दलले उम्मेदवारी दर्ताकै क्रममा निर्वाचन आचारसंहिता उल्लंघन गर्दा निर्वाचन आयोगका कर्मचारी मूकदर्शक बनेको आरोप लगाए । धनुषाको सबैला नगरपालिकामा प्रमुख पदमा उम्मेदवारी दर्ता गराएका बीपी साहले ग्रामीण क्षेत्रका मतदाताले आफ्नो पार्टीलाई पुरानो पार्टीको विकल्पका रूपमा लिएको दाबी गरे ।

‘हामीले उठाएको किसानको समस्या र स्थानीय तहमा जनप्रतिनिधिले गरेको भ्रष्टाचारविरुद्ध आन्दोलनले ग्रामीण क्षेत्रमा सकारात्मक छाप परेको छ,’ उनले भने, ‘मतदाताको झुकाव हामीतिर बढेपछि अन्य पार्टीले भ्रम फैलाउने चुनौती छ ।’

पुराना दलहरू डर, त्रास देखाएर मतदाता प्रभावित पार्न सक्रिय भएको आरोप पनि उनले लगाए । उनले निर्वाचन कार्यालयमाथि पनि टिप्पणी गर्दै भने, ‘हाम्रा उम्मेदवारको कागजातमा कैफियत देखाउने निर्वाचन अधिकृतले अन्यको मनोनयनपत्र अध्ययन नगरी दर्ता गरेको देखियो ।’

प्रकाशित : वैशाख १३, २०७९ ०६:४५
प्रतिक्रिया
पठाउनुहोस्

चन्द समूह पनि प्रतिस्पर्धामा

दल दर्ता नभएकाले स्वतन्त्र उम्मेदवारी
कान्तिपुर संवाददाता

काठमाडौँ — वैज्ञानिक समाजवाद स्थापनाका लागि एकीकृत जनक्रान्तिको नारासहित चुनाव बहिष्कार गर्दै आएको नेत्रविक्रम चन्द समूहले विभिन्न पालिकामा उम्मेदवारी दर्ता गराएको छ । स्थानीय तहको निर्वाचन सदुपयोग गर्ने नीति अघि सारे पनि दल दर्ता नभएकाले उक्त समूहका नेता–कार्यकर्ताले स्वतन्त्र रूपमा उम्मेदवारी दिएका हुन् । 

रोल्पाका ६ पालिका अध्यक्षमा चन्द समूहबाट उम्मेदवारी दर्ता भएको छ । गंगादेव गाउँपालिकामा चूडामणि वली, थबाङमा अमित घर्तीमगर, सुनीलस्मृतिमा कमल थापा, परिवर्तनमा लालबहादुर डाँगी, लुंग्रीमा भूपेन्द्र खड्का र सुनछहरीमा पुष्टमन घर्तीमगरले उम्मेदवारी दिएका हुन् । वली केन्द्रीय सदस्य र अन्य जिल्ला सदस्य हुन् । अन्य पदमा पनि चन्द समूहका कार्यकर्ताले उम्मेदवारी दिएका छन् । ‘स्थानीय तह जनतासँग प्रत्यक्ष सम्पर्कमा रहने भएकाले चुनावलाई उपयोग गर्ने नीति पार्टीले लिएको छ,’ वलीले भने, ‘हामीले जित्यौं भने नयाँ संस्कृतिसहितको समाज निर्माणमा योगदान गर्न सक्छौं ।’

कपिलवस्तुको शिवराज नगरपालिकामा केन्द्रीय सदस्य भेषराज भुसालले आइतबार प्रमुख पदका लागि उम्मेदवारी दिएका छन् । शिवराज–९ को वडाध्यक्षमा मालबहादुर घर्तीमगरले उम्मेदवारी दिएका छन् । वडा सदस्यमा सुमित्राकुमारी घर्तीमगरको पनि उम्मेदवारी परेको छ । वाणगंगा नगरपालिका–५ को वडा सदस्यमा ज्ञानेन्द्र पाण्डेले स्वतन्त्र उम्मेदवारी दिएका छन् ।

‘अन्य ठाउँमा पनि कार्यकर्ताले स्वतन्त्र हैसियतमा उम्मेदवारी दिएका छन्,’ समूहका केन्द्रीय सदस्य भेषराज भुसालले भने, ‘जित्न पर्छ भन्ने छैन । स्वतन्त्र, देशभक्त, इमानदारलाई सहयोग गरेर मुलुक बचाउने अभियान हो ।’ शिवराज पार्टी महासचिव चन्दको गृहनगर हो ।

चन्द समूहका प्रवक्ता खड्कबहादुर विश्वकर्माको गृह जिल्ला कालीकोटका ९ वटै पालिकामा स्वतन्त्र हैसियतमा उम्मेदवारी दर्ता गराइएको छ । कालीकोट चन्द समूहको प्रभाव क्षेत्र मानिन्छ । यहाँका ४ वटा स्थानीय तहमा आइतबार उम्मेदवारी दर्ता गरेको चन्द समूहका नेताहरूले सोमबार थप ४ वटा स्थानीय तहका सबैजसो पदमा उम्मेदवारी दिएका छन् ।

नरहरिनाथ गाउँपालिकाको अध्यक्षमा केन्द्रीय सदस्य एटम बीसी र उपाध्यक्षमा कलशा विक, रास्कोट नगरपालिका प्रमुखमा संविधानसभा २०६४ की सदस्य धीरेन्द्राकुमारी उपाध्याय र उपप्रमुख फूलटौरा विक, पचालझरना गाउँपालिका अध्यक्षमा जिल्ला सचिव मनिलाल ऐडी र उपाध्यक्षमा विनीत तिरुवाले उम्मेदवारी दिएका छन् । सान्नीत्रिवेणीको अध्यक्षमा भने चन्द समूहका रूपसिंह बोहरा र ब्यासी कामी गरी दुई जनाको उम्मेदवारी परेको छ । खाडाचक्रको प्रमुखमा हस्त विक र उपप्रमुखमा शारदा शाही, तिलागुफा नगर प्रमुखमा नरेन्द्र चदारा, उपप्रमुख धनराज शाही, महाबैको अध्यक्षमा धनबहादुर सिंह, पलाताको अध्यक्षमा पदमबहादुर विश्वकर्मा, शुभकालिकाको अध्यक्षमा मनीष विकलगायतले उम्मेदवारी दर्ता गराएका छन् । जिल्लामा अधिकांश वडाध्यक्ष र सदस्यमा पनि चन्द समूहको उम्मेदवारी परेको छ ।

गुल्मीको धुर्कोट गाउँपालिकामा चन्द समूहले अध्यक्ष, उपाध्यक्ष, दुई वडा अध्यक्ष र एक वडा सदस्यमा उम्मेदवारी दर्ता गराएको छ । अध्यक्षमा मैतबहादुर नेपाली, उपाध्यक्षमा तारा बस्नेतले उम्मेदवारी दिएका छन् । धुर्कोट–३ को वडाध्यक्षमा बाबुलाल नेपाली, धुर्कोट–६ को वडाध्यक्षमा चन्द्रबहादुर पाण्डे र धुर्कोट–४ को वडा सदस्यमा लक्ष्मी पोखरेलले उम्मेदवारी दर्ता गराएका हुन् । जिल्ला सचिव तरामु मगरले भने जनमत रक्षाका लागि धुर्कोटमा स्वतन्त्र उम्मेदवारी दिइएको बताए । ‘गुल्मी जिल्लामा हाम्रो जनमत भएको धुर्कोटमा उम्मेदवारी दिएका छौं,’ उनले भने, ‘अन्य स्थानमा एमसीसी विरोधी उम्मेदवार र दललाई समर्थन गर्छौं ।’

पाल्पाको तिनाउ गाउँपालिकामा पूर्वजिल्ला कमिटी सचिव भुवन जीसीले अध्यक्षमा स्वतन्त्र उम्मेदवारी दर्ता गराएका छन् । आफू निकट नेताको बैठकमा उनले पार्टीबाट राजीनामा दिनुपर्ने अवस्था आए पनि उम्मेदवारी दिएको बताएका थिए । पार्टीले जीसीलाई हटाएर पूर्वलडाकु कमान्डर मीनबहादुर आलेलाई सचिव बनाइसकेको छ । चन्द समूहले तिनाउ–२ मा टोपबहादुर विक, ३ मा नीरबहादुर विक, ४ मा मानबहादुर दर्लामीले वडाध्यक्षमा उम्मेदवारी दिएका छन् ।

गोरखा नगरपालिकाको प्रमुखमा चन्द समूहका योगेन्द्र कुमालले मनोनयन दर्ता गराएका छन् । चन्द समूहका पूर्वजिल्ला इन्चार्ज कुमाल हाल विशेष समिति सदस्य छन् । चन्द समूहकी सेती महाकाली ब्युरो सदस्य गौरा धामीले डडेलधुराको परशुराम नगरपालिकामा उपप्रमुखमा उम्मेदवार दिएकी छन् । यस्तै, सर्लाहीको वाग्मती नगरपालिका प्रमुखमा धनकुमारी खड्का पौडेल उम्मेदवारी बनेकी छन् । उनी प्रहरीको ‘इन्काउन्टर’ मा मारिएका कुमार पौडेलकी श्रीमती हुन् । कुमारका भाइ हरिकृष्णले पार्टीको समर्थनमा खड्काले उम्मेदवारी दिएको बताए ।

चन्द समूहका नेता–कार्यकर्ताले अन्य पालिकामा पनि मनोनयन दर्ता गराएका छन् । महासचिव चन्दका स्वकीय सचिव असल क्षत्रीले आफ्नो पार्टीका नेता–कार्यकर्ताबाट स्वतन्त्र हैसियतमा करिब दुई दर्जन पालिकामा उम्मेदवारी परेको जानकारी आएको बताए । ‘तर पूरा विवरण आउन बाँकी छ,’ उनले भने ।

कपिलवस्तुमा गत चैतमा सम्पन्न १२ औं पूर्ण बैठकमा स्थानीय निर्वाचनमा भाग लिने महासचिव चन्दको प्रस्ताव अल्पमतमा परेपछि स्थानीय तहमा स्वतन्त्र उम्मेदवारी दिन चाहने नेता–कार्यकर्तालाई भने नरोक्ने निर्णय गरेको थियो ।

काशीराम डाँगी (रोल्पा), माधव अर्याल (पाल्पा), तुलाराम पाण्डे (कालीकोट), मनोज पौडेल (कपिलवस्तु) र गगनशीला खड्का (गुल्मी)

प्रकाशित : वैशाख १३, २०७९ ०६:४१
पूरा पढ्नुहोस्
प्रतिक्रिया
पठाउनुहोस्
×