काठमाडौँ — पदम काफ्ले पहिलो पुस्तकाकार कृति ‘युग यात्रा’ सहित पाठकमाझ आएका छन् । भुटानी नेपालीभाषीको कथाव्यथा समेटिएको उक्त उपन्यास काठमाडौंमा साहित्यकारहरू कृष्ण धराबासी, शैलेन्दुप्रकाश नेपाल, तारालाल श्रेष्ठ,  सञ्जय बान्तवा र कविता लामा, समाजशास्त्री मीना पौडेल, चित्रकार अस्मिना रञ्जित, लेखक राधेश्याम लेकाली एवं पत्रकार शेखर खरेलले लोकार्पण गरे ।

साहित्यकार धराबासीले भुटानी नेपालीभाषीहरू जन्मभूमिबाट लखेटिएर पूर्वी नेपालमा आएदेखि आफूले उनीहरूको मुद्दा उठाएको विगतको स्मरण गर्दै ‘युग यात्रा’ ले त्यस कालखण्डलाई पठनीय रूपमा अभिलेखीकरण गरेको बताए । ‘यस उपन्यासको नायकलाई सुरूमा सानो बच्चाका रूपमा देखाइएको छ, तर बुद्धि नपसेको बच्चाका रूपमा,’ उनले भने, ‘बच्चामा वयस्कको बुद्धि हाल्दा कथानक अविश्वसनीय हुन जान्छ, त्यो गल्ती पदमजीले गर्नुभएको छैन । उपन्यासमा चित्रित अरू विवरण पनि यस्तै किसिमले विश्वसनीय छन् ।’

उपप्राध्यापक तारालाल श्रेष्ठले भुटानी नेपालीभाषीहरूको शरणार्थी जीवनदेखि तेस्रो देश पुनःस्थापनासम्मको दुःखसुखलाई ‘युग यात्रा’ ले समेटेको सुनाए । ‘तर पात्र र घटनाहरू वास्तविक रहेकाले यो कृति आख्यान हो कि आत्मकथा, छुट्ट्याउन गाह्रो हुने देखिन्छ,’ उनको भनाइ थियो, ‘परिवेश चित्रण यस कृतिको सबल पक्ष हो ।’

समाजशास्त्री मीना पौडेलले जुनजुन मुलुकमा पुनःस्थापना गराइए पनि भुटानी नेपालीभाषीहरूले आफ्नो पहिचान भुल्न नसकेको उल्लेख गर्दै ‘युग यात्रा’ ले त्यसलाई प्रतिविम्बित गरेको बताइन् । ‘मौलिक पहिचानप्रतिको मोह यस उपन्यासमा राम्ररी देखाइएको छ,’ उनले भनिन्, ‘शरणार्थी जीवनका कष्टकर भोगाइ र तेस्रो मुलुकमा पुनःस्थापनापछिका उपलब्धिलाई लैंगिक हिसाबले सन्तुलित बनाउन सकिएको भए अझ राम्रो हुने थियो ।’

शंकर लामिछाने प्रतिष्ठानका अध्यक्ष राधेश्याम लेकालीले पहिलो कृतिका लागि पदम काफ्लेलाई बधाई दिँदै भाषा–साहित्यले नै कुनै पनि जातिलाई जीवन्त बनाउने धारणा राखे ।