सुनसरी — बालबालिकामा सिर्जनात्मक पठन संस्कृतिको विकास, कला–साहित्यप्रतिको अभिरुचि अभिवृद्धि तथा मौलिक सोच र अभिव्यक्ति क्षमताको विकास गर्ने उद्देश्यले इटहरीमा दुई दिने ‘बाल कला महोत्सव’ आयोजना हुने भएको छ ।

पाथीभरा माध्यमिक विद्यालको आयोजनामा आगामी फागुन १ र २ गते ऊक्त महोत्सव सञ्चालन हुन लागेको हो। डिजिटल स्क्रिन, मोबाइल र परीक्षा केन्द्रित पढाइले बालबालिकाको सिर्जनशीलता खुम्चिँदै गएकाले बाल मन, कल्पना र अभिव्यक्तिलाई केन्द्रमा राखेर दुई दिने बाल कला साहित्य महोत्सव गर्न लागिएको विद्यालय व्यवस्थापन समिति अध्यक्ष निर्मल रिजालले जानकारी दिए । यो महोत्सवलाई बाल साहित्य, कला र पठन संस्कृतिको साझा उत्सवका रूपमा लिइएको उनले बताए। 

इटहरी उपमहानगरपालिकाको अभिभावकत्व तथा बुकल्याण्ड, काठमाडौंको सहआयोजनामा हुन लागेको महोत्सवमा काव्य–डबली, प्याब्सन कोशी प्रदेश, प्याब्सन इटहरी, हिसान सुनसरी, संगीत साधना प्रतिष्ठान इटहरी, कारखाना, वेदा, प्ले नेपाल र काठमाडौं प्रकाशनको सहकार्य रहेको छ । 

महोत्सवले सिर्जनात्मक पठन संस्कृतिको विकास, भाषा सीप अभिवृद्धि, आलोचनात्मक र समय सापेक्ष सोच विकास तथा मौलिक अभिव्यक्तिको अभ्यासलाई प्राथमिकतामा राखेको अध्यक्ष रिजालले बताए । 

दुई दिने महोत्सवमा ३ वटा प्यानल डिस्कसन (छलफल) र २४ वटा कार्यशाला सञ्चालन गरिनेछन् । प्यानल डिस्कसनमा बालसाहित्य, पठन संस्कृति, सिर्जनात्मक शिक्षा र अभिभावक–विद्यालयको भूमिकाबारे बहस हुनेछ ।