छन्दमा कविता लेख्ने सूर्यवदना राजनीति र सामाजिक क्षेत्रमा पनि सक्रिय छन् ।
चितवन — सूर्यवदना हमाल 'कुसुम'को कविता सङ्ग्रह 'स्मृतिका छालहरू' बिहीबार सार्वजनिक भएको छ । अभिव्यञ्जना साहित्य प्रतिष्ठानले भरतपुरमा आयोजना गरेको कार्यक्रममा गैंडाकोट नगरपालिका नगर प्रज्ञा प्रतिष्ठानका कुलपति साहित्यकार गोविन्दराज विनोदीले उक्त कविता सङ्ग्रहको विमोचन गरेका छन् ।
सङ्ग्रहमा हमालले लेखेका ४९ कविताहरू छन् ।
२०१२ चैत्रमा लमजुङमा जन्मिएकी हमालको यो दोस्रो कविता सङ्ग्रह हो । यसअघि हमालको पहिलो कविता सङ्ग्रह 'अनुभूतिका पाइलाहरू' प्रकाशित भएको थियो । भरतपुरमा बस्दै आएकी हमालले २०४० सालदेखि नै कविता लेख्दै आएकी छन् । खास गरेर छन्दमा कविता लेख्ने हमाल राजनीति र सामाजिक क्षेत्रमा पनि सक्रिय छन् ।
