काठमाडौँ — आख्यानकार तारा खत्री रोकायाको पहिलो उपन्यास 'शुक्लाम्बरा' माथि राजधानीमा विमर्श गरिएको छ । 

कार्यक्रममा समीक्षक अनिता कोइरालाले 'शुक्लाम्बरा' यथार्थमा आधारित उपन्यास भएको र यसमा सङ्घर्षले जीवनलाई पार तार्नुपर्ने सन्देश प्रस्तुत गरिएको धारणा राखिन् । उपन्यासमा लैङ्गिक विभेदको कथादेखि लिएर सांस्कृतिक द्वन्द्वको विषयसमेत समेटिएको उनको भनाइ थियो । 

समीक्षक भारती न्यौपानेले उपन्यासमा पितृसत्ताले छोपेको खोटाङको समाज चित्रण भएको बताइन् । 'समाजका हरेक ग्रामीण इलाकामा हुर्किएका नारीको कथाबाट 'शुक्लाम्बरा' को जन्म भएको छ,' उनले भनिन्, 'सांस्कृतिक द्वन्द्वको पाटो खोतल्न सकेको भए कृतिको सौन्दर्य अझै थपिने थियो ।'

निबन्धकार युवराज नयाँघरेले कृतिकारलाई शुभकामना दिँदै हुम्लाका चित्र, चरित्र र बाछिटा कृतिमा पोखिएकाले यो सुन्दर बनेको बताए । उनले हुम्लाका अँध्यारा गुजुल्टाभित्र न्याय, समानता र उज्यालोको खोजी गर्न उपन्यासले विशेष भूमिका खेल्ने अभव्यिक्त दिए ।