फाल्गुनन्दमा आयोजित कार्यक्रममा प्रज्ञा प्रतिष्ठानका सदस्यहरूको उपस्थिति रहेको थियो, उनीहरुले काइँलाको कृतित्वमाथि चर्चा गरेका थिए।
पाँचथर — फाल्गुनन्द प्रज्ञा-प्रतिष्ठान, फाल्गुनन्द गाउँपालिकाको आयोजनामा बैरागी काइँलाको ८७ औं जन्मोत्सव मनाइएको छ ।
नेपाल प्रज्ञा प्रतिष्ठानका पूर्व कुलपति तथा तेस्रो आयामका प्रवर्तक मुन्धुमविद् तथा एवं विराट प्रतिभासमेत रहेका काइँलाको जन्मोत्सव मनाइएको हो ।
फाल्गुनन्द गाउँपालिकाका अध्यक्ष तथा फाल्गुनन्द प्रज्ञा-प्रतिष्ठानका प्रमुख संरक्षक बृजहाङ आङ्गदेम्वे, उपाध्यक्ष तथा प्रतिष्ठानका संरक्षक ठाकुरसिं नेम्बाङ र साहित्यकार एवम् दिग्गज राजनीतिज्ञ नरेन्द्र कुमार केरुङ र प्रतिष्ठानका कुलपति समदर्शी काइँलाको उपस्थिति रहेको थियो ।
प्रतिष्ठानका उपकुलपति एल.बी. नेम्वाङले बैरागी काइँलाको कृतित्व र व्यक्तित्वमाथि प्रकाश पार्दै काइँला नेपालकै शिखर कवि भएको बताए । प्रतिष्ठानकै सभा सदस्य बबिता नेम्बाङले काइँलाको कृतित्व र व्यक्तित्वमाथि चर्चा गर्दै ऐतिहासिक घरको कथा पनि सुनाइन् ।
यस्तै साहित्यकार नरेन्द्र कुमार केरुङले काइँलाको सदावहार कविता 'मातेको मान्छेको भाषण; मध्यरातपछिको सडकसित' भन्ने कविताको केही अंश सुनाउँदै काइँलाको साहित्यिक सृजनाबारे प्रकाश पारेका थिए ।
बृजहाङ आङ्देम्वेले विराट प्रतिभा काइँलालाई पालिकाले नागरिक अभिनन्दन गरेको, पालिकाको स्थानीय पाठ्यक्रम कक्षा ८ मा काइँलाको जीवनी राखिएको, काइँला जिवित रहदै काइँलाको जन्मोत्सव मनाएर सम्मान दर्शाएको र अझै आगामी दिनहरुमा पालिकाले सकेसम्म बैरागी काइँलाले पुर्याएको अतुलनीय योगदानको कदर गर्दै बताए ।
