इटहरी — सुनसरीको इटहरी उपमहानगरपालिका-२० तरहरामा भएको राष्ट्रिय कविता प्रतियोगितामा कवि अविनाश भट्टराईको कविता ‘झ्यालको सौन्दर्यशास्त्र’ पहिलो बनेको छ। 

‘स्व. नारायण पौडेल स्मृति तरहरा राष्ट्रव्यापी खुल्ला कविता प्रतियोगिता–२०८२’ का लागि प्राप्त भएका ४०६ कवितामध्ये १० वटा कविता छनोट गरी वाचनसहित अन्तिम प्रतिष्पर्धा भएको थियो। 

प्रतियोगितामा भट्टराई पहिलो बनेका हुन्। प्रतियोगितामा खोटाङका कवि शुभचन्द्र राईको ‘आशा’ शीर्षकको कविता द्वितीय भयो । यस्तै, रसुवाकी कवि एलिसा एकलासको ‘पृथ्वीको अन्तिम रूख’ शीर्षकको कविताले तृतीय स्थान प्राप्त गर्‍यो। यसैगरी सप्तरीकी रोमा लम्साल नुराको ‘मानिसलाई रूखको अन्तिम प्रश्न’ र दैलेखका दीपिन सिजापतीको ‘सङ्घर्ष र सङ्कल्प’ सान्त्वना भयो ।

जनसहयोग २०५० समूह तरहराले गरेको प्रतियोगितामा प्रथम, द्वितीय, तृतीय र प्रोत्साहन पुरस्कार क्रमश: नगद ५१ हजार एक सय, ४१ हजार एक सय, ३१ हजार एक सय र ११ हजार एक सय प्रदान गरियो।