काठमाडौँ — साहित्यसुधा नेपालको छैटौँ वार्षिकोत्सवको अवसरमा दुई स्रष्टा सम्मानित भएका छन् । नेपाल प्रज्ञाप्रतिष्ठान कमलादी काठमाडौँमा शनिबार आयोजित कार्यक्रममा यस वर्षको 'हरिभक्त साहित्यसुधा सम्मान- २०८१,' कवि दिव्यलक्ष्मी पोखरेल र 'केवलपुरे किसान साहित्यसुधा सम्मान तथा पुरस्कार-२०८१' बाट पोषराज पौडेल सम्मानित भएका हुन् ।

उनीहरुलाई कवि नवराज लम्सालले नगद र प्रमाणपत्र हस्तान्तरण गरे । पोखरेलले औपचारिक शिक्षाबिना नै छन्दमा कविता सिर्जना गरेर कृति प्रकाशन गरेका छन् भने पौडेलका दर्जनौं कृति प्रकाशित छन् ।

कार्यक्रमलाई सम्बोधन गर्दै कवि लम्सालले समाज र देशलाई केही दिन सक्ने साहित्यको सिर्जना गर्न साधनामा निरन्तर लाग्नुपर्नेमा जोड दिए । उनले जस्तो बोलिन्छ त्यस्तै जीवन बाँच्न सकियो भने सार्थक हुने भन्दै सम्मानित स्रष्टाहरुलाई बधाई दिए ।