इलाम — इलाम चौथो साहित्य महोत्सव आउँदो चैत १ र २ गते हुने भएको छ । साहित्यको क्षेत्रबाट इलामको पर्यटन प्रवर्द्धन गर्दै इलामको साहित्यलाई देश विदेशमा चिनाउने उद्देश्यका साथ साहित्य महोत्सवको आयोजना गर्न लागिएको बिहीबार पत्रकार सम्मेलन गरी आयोजकले जानकारी दिएको छ ।

साथै कार्यक्रममा आयोजकले लोगोसमेत सार्वजानिक गरेको छ । 'पर्यटनका लागि साहित्य' भन्ने नाराका साथ हुन लागेको महोत्सवमा नेपाल र भारत, भियतनामलगायत युरोपियन देशका चर्चित साहित्यकारहरूको उपस्थिति रहने आयोजक इलाम साहित्य कला संगीत प्रतिष्ठानका अध्यक्ष प्रकाश थामसुहाङले बताए  ।

साहित्यिक क्षेत्रमा अग्रपंतिमा रहेको इलाम पछिल्ला दिनमा खस्कँदै गएको भन्दै त्यसको पुनर्जागरणका लागि चौथो संस्करणको महोत्सव हुन लागेको हो । यसअघि २०७६ सालमा प्रथम इलाम साहित्य महोत्सव सञ्चालन भएको थियो ।