कान्तिपुर वेबसाईट
AdvertisementAdvertisement

रंगकर्मी खतिवडाको कथा संग्रह 'अकथ्य' सार्वजनिक

काठमाडौँ — रंगकर्मी प्रवीण खतिवडाको पहिलो कथा संग्रह 'अकथ्य'को शनिबार विमोचन गरिएको छ । विश्लेषक सिके लाल, साहित्यकार एवम् कलाकार सगुना शाह र लेखक खतिवडाले एक समारोहकाबीच नेपाल प्रज्ञा प्रतिष्ठानको डबलीमा पुस्तकको लोकार्पण गरेका थिए । खतिवडाको कथा संग्रहमा नौ वटा कथा समेटिएका छन् ।

रंगकर्मी खतिवडाको कथा संग्रह 'अकथ्य' सार्वजनिक

पुस्तक विमोचन गर्दै विश्लेषक सिके लालले खतिवडाले आँसु, आवेग र परिवर्तनको चाहनाका कथा लेखेको र ती कथा पाठकलाई सोच्न र यथास्थितिमाथि प्रश्न गर्न बाध्य पार्ने खालको भएको टिप्पणी गरे ।

'केन्द्रीय पात्रहरुलाई स्थापित गरेर नाटक र सिनेमाको उतारचढावयुक्त संरचनामा लेखिएका कथाहरु पुस्तकमा छन्,' विश्लेषक लालले भने, 'सायद त्यहि भएर कथाहरुमा सहायक पात्र गौण छन् ।'

यसैगरी साहित्यकार एवम् कलाकार सगुना शाहले प्रवीणका कथाहरु गम्भीर र गहन भएको टिप्पणी गरिन् । कलाकार सौगात मल्लले खतिवडासँग र रंगमञ्चदेखि चलचित्रसम्म आफ्नो सहकार्य हुने गरेको चर्चा गरे । 'कथा लेख्ने, सृजनात्मक लेखन गर्ने कुरा त हामीबीच हुन्थ्यो । म लेख्ने काममा अलमल गरिरहेको थिएँ,' मल्लले भने, 'तर मेरो भाइले मलाई सृजनात्मक लेखनमा उछिन्यो ।'

लेखक खतिवडा नेपाली रंगमञ्चका व्यस्त कलाकार र निर्देशक हुन् । अभि सुवेदीद्वारा लिखित तथा सुनील पोखरेलद्वारा निर्देशित आरोहण गुरुकुलको चर्चित नाटक अग्निको कथा (२०६०) बाट उनले रंगमञ्चको अभिनय यात्रा अघि बढाएका थिए ।

त्यसयता उनले रशोमन, मार्क्स फर्किए, न्यायप्रेमी, घनचक्कर, पानी फोटो, बाघ भैरव जस्ता तीन दर्जनभन्दा बढी नाटकमा अभिनय गरिसकेका छन् । त्यस्तै ध्रुव, महादेवको बाजी, लखन पटवारी, ऊ कसको, सरजमिन, मिमांशा, मार्क्स फर्किए, विमोक्ष आदि नाटकको निर्देशनसमेत गरिसकेका छन् ।

खतिवडाले नेपाली चलचित्रमा समेत अभिनय गर्दै आएका छन् । लुटबाट चलचित्र अभिनय यात्रा थालेका खतिवडाले लटु २, ढुवानी, विना कारण, कालो पोथी, जात्रा, महाजात्रा, मनसरा, उमा, द स्पोन्सर, मिस्टर झोले, खाग आदि चलचित्रहरूमा अभिनय गरेका छन् ।

प्रकाशित : फाल्गुन १९, २०८० १९:१९
प्रतिक्रिया
पठाउनुहोस्
जनताको राय

सरकारी जग्गा र भवन राजनीतिक दल र तीनका भातृ संगठनले कब्जा गरेर बस्नुलाई के भन्नुहुन्छ ?