सिलिगुडी — दार्जिलिङ र सिक्किम हिमालयन क्षेत्रको इतिहासका विज्ञ मानिन्छन्, सोनम बी वाङ्गेल । त्यस भेगको इतिहासलाई समेटेर वाङ्गेलले लेखेको अंग्रेजी भाषाको अनुसन्धानमूलक पुस्तक ‘दार्जिलिङ : प्लेस नेम्स्’ शनिबार सिलिगुडीमा लोकार्पण भयो ।

करिब दुई दशकभन्दा लामो अनुसन्धानपछि उक्त पुस्तक लेखिएको वाङ्गेलले जनाए । शिक्षाविद् जेता सांकृत्यायन, नाटककार पी अर्जन, लेखक सत्यदीप क्षेत्री र कृतिकार वाङ्गेलले संयुक्त रूपमा पुस्तक लोकार्पण गरेका थिए । विमोचनपछि आयोजना गरेको छलफलका वक्ताहरूले भने, ‘यो किताब मात्रै नभएर एक बौद्धिक यात्रा हो ।’

‘हामी हाम्रो जन्मस्थानको औपनिवेशिक इतिहास पढेर हुर्कियौं । यो पुस्तक भावी पुस्ताका लागि महत्त्वपूर्ण दस्ताबेज हो,’ प्राध्यापक सांकृत्यायनले टिप्पणी गरे, ‘यहाँ स्वदेशी इतिहासकारको दृष्टिकोण पाउन सकिनेछ ।’ पी अर्जुनले वाङ्गेलको पुस्तकमा दार्जिलिङ र सिक्किमको हिमाली क्षेत्रको अप्रत्याशित इतिहास पढ्न पाइने जनाए । सत्यदीप छेत्रीले औपनिवेशिक ह्याङओभरको बादलमुनि भौंतारिने समय गएको बताउँदै आफ्ना कथाहरू पुनः दाबी गर्दै आफ्नै शैलीमा सुनाउने समय आएको जनाए ।

पत्रकार अनुराधा शर्माले यति सानो भूगोलको अद्भुत विविधताको मनोरम संकलन पुस्तकको सबैभन्दा राम्रो पक्ष रहेको टिप्पणी गरिन् । उनले भनिन्, ‘पुस्तकमा पौराणिक कथा, भाषाविज्ञान, लोककथा, ज्ञानविज्ञानलाई एकसाथ बुन्दै दार्जिलिङको वास्तविक कथा भनिएको छ ।’ लेखक वाङ्गेलले लामो मिहिनेतको फलका रूपमा पुस्तकलाई पाठकको हात सुम्पिएको जनाउँदै भने, ‘आशा छ, त्यो समय आउनेछ जब हाम्रो आफ्नै इतिहासलाई सम्पूर्ण विश्वले तर्कसंगत मौलिक परिप्रेक्ष्यमा मान्यता दिनेछ ।’