नतिजामा सबैभन्दा धेरै क्याफिनयुक्त कफी पिउने समूहमा डिमेन्सिया जोखिम १८ प्रतिशत कम देखिएको थियो ।
What you should know
काठमाडौँ — क्याफिनयुक्त कफी र चिया पिउने मानिसमा स्मरणशक्ति कमजोर हुने (डिमेन्सिया) जोखिम कम हुनसक्ने संकेत एक अध्ययनले देखाएको छ ।
चिकित्सा जर्नल जामा मा हालसालै प्रकाशित अध्ययनका अनुशार सन् १९८६ देखि २०२३ सम्म सञ्चालन भएका दुई अध्ययनमा सहभागी १ लाख ३१ हजार ८ सय २१ जनाको तथ्यांक विश्लेषण गरेको थियो । अध्ययन अवधिमा तीमध्ये ११ हजार ३३ जनामा स्मरणशक्ति कमजोर हुने समस्या देखिएको थियो ।
अनुसन्धानकर्ताहरूले सहभागीहरूको कफी, क्याफिनयुक्त चिया र डिक्याफ कफी सेवनसम्बन्धी तथ्यांक र समयक्रममा संज्ञानात्मक स्वास्थ्यको अभिलेख तुलना गरे। नतिजामा सबैभन्दा धेरै क्याफिनयुक्त कफी पिउने समूहमा डिमेन्सिया जोखिम १८ प्रतिशत कम देखिएको थियो ।
अनुसन्धानकर्ताहरूका अनुसार दिनमा २–३ कप क्याफिनयुक्त कफी वा १–२ कप क्याफिनयुक्त चिया पिउनेमा फाइदा बढी देखिएको छ । तर डिक्याफ कफी र डिमेन्सिया जोखिमबीच कुनै महत्वपूर्ण सम्बन्ध देखिएको छैन ।
सिबीएस न्युजकी मेडिकल विशेषज्ञ तथा हेल्थ न्युजकी स्वास्थ्य सम्पादक डा.सेलिन गाउन्डरले नतिजालाई धेरै ठूलो सावधानीका साथ लिनुपर्ने बताएकी छन् । उनले अध्ययनले जोखिममा सानो मात्र कमी देखाएको र तथ्यांकले केवल सम्बन्ध देखाएको भन्दै कफीले नै डिमेन्सिया रोक्छ भन्ने निष्कर्ष निकाल्नु उचित नभएको बताएकी छन् ।
गाउन्डरले स्मरणशक्ति कमजोर हुने जोखिममा कफी सेवन बाहेक अन्य कारणहरू पनि असर गर्न सक्ने जिकिर गरेकी छन् । उदाहरणका लागि, उच्च रक्तचाप भएका व्यक्तिहरूले स्वास्थ्य कारणले क्याफिनयुक्त पेयबाट टाढा रहन सक्छन्, जबकि उच्च रक्तचाप आफैं पनि स्मरणशक्ति कमजोर हुने जोखिम कारक हो ।
अल्जाइमर एसोसिएसनका अनुसार ७० लाखभन्दा बढी अमेरिकीहरू अल्जाइमर रोगबाट प्रभावित छन्, जुन स्मरणशक्ति कमजोर हुने सबैभन्दा सामान्य कारण हो ।
गाउन्डरले अध्ययनका आधारमा मानिसहरूले आफ्नो आहारमा ठूलो परिवर्तन नगर्न सुझाव दिँदै स्मरणशक्ति कमजोर हुने जोखिम घटाउन नियमित व्यायाम, सन्तुलित आहार, तौल नियन्त्रण र श्रवणशक्ति जाँच गर्नुपर्ने बताएकी छन् ।
