काठमाडौँ — १५ वर्षको उमेर नपुग्दै गाँजा सेवन गर्ने किशोरकिशोरीमा पछि मानसिक तथा शारीरिक स्वास्थ्य समस्याको जोखिम उल्लेखनीय रूपमा देखिने एक अध्ययनले देखाएको छ ।

यस्ता किशोरकिशोरी विशेषगरी १९ देखि २५ वर्षको बीच स्वास्थ्य उपचारका लागि अस्पताल तथा स्वास्थ्य संस्थामा पुग्ने सम्भावना अरूको तुलनामा धेरै देखिएको छ । यो अनुसन्धान क्यानडाको म्याकगिल विश्वविद्यालयका मनोवैज्ञानिक मासिमिलियानो ओर्री नेतृत्वमा गरिएको हो ।

यो अनुसन्धानमा जन्मदेखि युवावस्थासम्म पछ्याइएका करिब एक हजार पाँच सय बालबालिकाको तथ्यांक विश्लेषण गरिएको थियो । अनुसन्धानमा उनीहरूको पारिवारिक अवस्था, सामाजिक सम्बन्ध, व्यवहार र स्वास्थ्यसँगै १२ देखि १७ वर्षको उमेरबीच गाँजा सेवनको अवस्थालाई अध्ययन गरिएको हो । 

अनुसन्धानअनुसार करिब ६० प्रतिशत किशोरकिशोरीले किशोरावस्थामा गाँजा सेवन गरेका थिएनन् । बाँकी ४० प्रतिशतमध्ये आधाले ढिलो गाँजा सेवन सुरु गरेका थिए । उनीहरुले १७ वर्ष पुग्दासम्म महिनामा एक पटकभन्दा कम सेवन गर्ने गरेको अध्ययनका क्रमममा पाइएको थियो । 'करिब २० प्रतिशतले १५ वर्ष नपुग्दै गाँजा सेवन सुरु गरेका थिए, उनीहरुले १७ वर्ष पुग्दा महिनामा कम्तीमा एक पटक सेवन गर्ने गरेका थिए,' अध्ययनमा भनिएको छ ।