काठमाडौं — छालामा हुने दुबी नयाँ समस्या होइन । छालालाई कालो र खैरो रङ प्रदान गर्ने कोषिका ‘मेलानोसाइट’ को मृत्यु भएमा छालाले प्राकृतिक रङ गुमाउँछ । र दुबी देखिन्छ । मेलानोसाइटको अभावमा कसैको छालाको रङ गोरो हुन्छ त कसैको कालो । दुबी कुनै ठूलो रोग त होइन तर दुबी देखिएकाहरूले छालाको स्याहारमा विशेष ध्यान पुर्‍याउनुपर्छ ।

छालाको हेरचाह कसरी गर्ने ? 

• बाहिर जानुअघि सनस्क्रिन (क्रिम) प्रयोग गर्नु राम्रो हुन्छ । सनस्क्रिनको प्रयोग गर्दा ‘एसपीअफ १५’ भएको वा सो भन्दा माथिको लगाउनुपर्छ ।
• सनग्लास प्रयोग गर्नु राम्रो हो । किनकि सनग्लासले आँखाको वरिपरि हुने जलनबाट बचाउन मद्दत गर्छ ।
• छालाको उचित हेरचाह गर्न र स्वस्थ राख्न प्रकृतिक तेलजस्तै जैतुन र तिलको तेल प्रयोग गर्न सकिन्छ । पातदार तरकारी, फलफूल, सलाद, पानी प्रशस्त मात्रामा खानुपर्छ ।
• छालालाई घामबाट बचाउन शरीर पूर्ण रूपमा छोपिएको लुगा लगाउन सकिन्छ । घाममा हिँड्नुपर्नेछ भने छाता वा ह्याटको प्रयोग गर्न राम्रो ।
• घडीको फित्ता, चप्पल र पन्जा जस्ता रबरबाट बनेको सामानबाट जोगिएकै राम्रो ।

के नगर्ने ? 

• जस्तो पायो त्यस्तै कस्मेटिक सामानबाट बच्नुहोस् । कपालमा लगाउने रङ, लिपस्टिकको प्रयोग नगर्नुहोस् ।
• शरीरको प्रभावित क्षेत्रमा कत्लापन वा दाग रोक्न प्रत्यक्ष सूर्य किरणबाट बच्नुहोस् ।
• सिन्थेटिक कपडाबाट बच्नका लागि सुतीका कपडा लगाउन सकिन्छ । शरीरमा कस्सिने खालका कपडा सकभर नलगाउनुहोस् । अनि छालामा हुन सक्ने चोटपटकबाट बच्न सावधानी अपनाउनुहोस् । किनकि छालाको चोटले दुबीलाई  थप समस्या पार्न सक्छ । अस्वस्थ खानाबाट जोगिनुहोस । ट्याटु नबनाउनुहोस् । 

के यसको उपचार छ ? 

दुबी आफैमा कुनै ठूलो समस्या होइन । यसको उपचार नै नगरे पनि ठूलो जोखिमको खतरा छैन । तर कतिपयले सौन्दर्यको कारण देखाउँदै यसको उपचार गर्न रुचाउँछन् । कतिपयले भने दुबीजन्य समस्याबारे हाम्रो सामाजिक बुझाइका कारण मानसिक समस्या पनि झेलिरहेका हुन्छन् । बालबालिकामा दुबी देखिए तुरुन्त उपचार गर्दा छिट्टै निको हुन्छ । उमेर बढदै जाँदा भने निको हुने समय लाग्न सक्छ ।