काठमाडौँ — विवाहलाई लिएर कैयौं मान्यताहरु छन् । जो धर्म, संस्कृति र स्थान अनुसार भिन्न भिन्न छन् । तर हिन्दू धर्म संस्कृतिको कुरा गर्ने हो विवाहलाई सात जन्मको सम्बन्धका रुपमा बुझिन्छ । यहाँ विवाह गर्नुलाई अपूर्णबाट जीवन पूर्णतामा प्रवेश गर्नुलाई लिइन्छ । 

यही संस्कृतिमा महिलाहरु विवाहपछि पतिलाई परमेश्वर मानेर पुरुषको दीर्घायू र स्वस्थ जीवनका लागि ब्रत, पूजा, पाठ जस्ता अनेक विधि गर्छन् । तर यस्ता कार्यबाट पुरुषको आयु लामो हुन्छ भन्नु केवल धार्मिक मान्यता मात्र हो । आयु त आफ्नो जीवनशैली, काम, उपभोग्य वस्तुका असर आदीले प्रभाव पार्छन् ।

यद्दपि पुरुषको आयुको कुरा गर्ने हो भने अविवाहितको तुलनामा विवाहित पुरुषको आयु लामो हुने एक अध्ययनमा पाइएको छ । केही समयअघि क्यानडामा गरिएको अध्ययनमा अविवाहितको तुलनामा विवाहित पुरुषको आयु लामो हुनुका साथै जीवन पनि गुणस्तरीय बन्ने गरेको निष्कर्ष निकालिएको छ । विना जीवनसाथीका पुरुषको तुलनामा विवाहित पुरुष बढी जिम्मेवार र सफल भएको अध्ययनमा दाबी गरिएको छ । 

अध्ययनमा महिला र पुरुषको आयुमा विवाहको असर अलग अलग हुने बताइएको छ । जहाँ विवाहित पुरुषको उमेर अविवाहित पुरुषको तुलनामा विस्तारै विस्तारै बढ्छ । महिलाको तुलनामा भने यो स्थिति केही फरक छ ।