काठमाडौँ — बजारमा अनेक रंग, फ्लेवर र मूल्यका साबुन पाइन्छन् । दैनिक जीवनमा  हात धुनदेखि नुहाउनका लागि साबुनको प्रयोग भइरहेको हुन्छ । साबुनले छाला सफा गर्नुका साथै भिटामिन एवं पोषक तत्त्व प्रदान गर्छन् । जसले गर्दा छाला स्वस्थ, मुलायम र नरम बन्छ ।

पछिल्लो समय जथाभावी साबुनको प्रयोग बढेको चिकित्सक बताउँछन् । छाला तथा यौन रोग विशेषज्ञ डा. रूपक घिमिरेका अनुसार आफ्नो छालाको बनोटअनुसार साबुनको प्रयोग गर्नु उचित हुन्छ । ‘धेरै व्यक्तिले विभिन्न विज्ञापन देखेर वा साथीहरूको सुझावमा साबुन प्रयोग गरेको पाइन्छ जुन गलत हो,’ उनी भन्छन्, ‘साबुन प्रयोग गर्दा आफ्नो छालाको प्रकृतिअनुसार प्रयोग गर्नुपर्छ ।’

कस्तो साबुन प्रयोग गर्ने ?

–रुखो छाला भए प्रयोग गर्दा मोस्चराइजिङयुक्त साबुन प्रयोग गर्नुपर्छ । डा. रूपकका अनुसार धेरैले बासनादार साबुन प्रयोग गर्न मन पराउँछन् । उनका अनुसार बासनाका लागि प्रयोग गरिएको साबुन सबै प्रकारका छालाका लागि सुट नहुन सक्छ । छालाका लागि फिँज आउने साबुन उपयुक्त हुन्छ । छालामा विभिन्न तेलग्रन्थी हुन्छन्, तिनले विभिन्न किसिमका तेल उत्पादन गरिरहेका हुन्छन् । तेल हटाउनका लागि फिँज आउने साबुन प्रयोग गर्नुपर्छ । साबुनमा प्रयोग भएको हानिकारक रसायनले छाला फुस्रो बनाउनुका साथै प्राकृतिक तेललाई समेत नष्ट गर्छ ।