काठमाडौँ — छालाको रोमछिद्र (पोर्स) खुला वा ठूलो देखिनु स्वाभाविक हो, तर राम्रो हेरचाह गरिएन भने छालामा तेल, फोहोर र ब्ल्याकहेड्स जम्न सक्छ । यसले छालालाई अस्वस्थ देखिन्छ । बाहिरी प्रदूषण र गलत खानपानको कारण पोर्समा फोहोर जम्छ ।

अनुहारको छालामा भएका ठूला रोम छिद्रले बुढ्यौलीको संकेत पनि देखाउँछ । स्वस्थ र चम्किलो छालाको लागि समयमै राम्रो हेरचाह गर्न आवश्यक छ । ब्युटिसियन शारदा तामाङका अनुसार छाला स्वस्थ, चम्किलो र सफा बनाउन यी टिप्स अपनाउन सकिन्छ ।

ब्ल्याकहेड्स हटाउने
ब्ल्याकहेड्स पोर्स पुरिन सक्छ । जसले अनुहारमा दाग बस्ने सम्भावना बढाउँछ । त्यसैले अनुहारलाई स्टिम दिएर पोर्स खोल्नुपर्छ । स्टिम दिइसकेपछि हल्का मसाज गर्दै ब्ल्याकहेड्स हटाउनुपर्छ । त्यसपछि बेकिङ सोडा वा फ्रुट पिल मास्क प्रयोग गर्न सकिन्छ । 

अनुहार सफा राख्ने
धुलो र तेलको कारण पोर्समा फोहोर जम्न सक्छ । त्यसैले नियमित रुपमा अनुहार सफा पानीले धुनुपर्छ । हल्का प्रकारको फेसवास प्रयोग गर्नुपर्छ । अनुहार धुने बेला तातो होइन, चिसो वा हल्का मनतातो पानी प्रयोग गर्नुपर्छ । ओपन पोर्स भएकाहरुले धेरै क्लिन्जिङको प्रयोग गर्नुहुँदैन । यसले छालामा भएको प्राकृतिक तेल नष्ट गरिदिन्छ ।