विराटनगर — कोशी प्रदेश सरकारले आर्थिक वर्ष २०८२/०८३ को अधिकांश बजेट खर्च आर्थिक वर्षको अन्तिम महिनामा गरेको देखिएको छ।

जेठसम्म कुल बजेटको ४५ दशमलव ५ प्रतिशत मात्रै खर्च गरेको सरकारले असारको २५ दिनमै करिब १० अर्ब रुपैयाँ भुक्तानी गरेपछि वार्षिक खर्च ७२ दशमलव ७२ प्रतिशत पुगेको हो।

तर, अन्तिम समयमा खर्च बढे पनि कुल र पुँजीगत दुवै खर्च ६ वर्षयताकै सबैभन्दा कम रहेको प्रारम्भिक तथ्यांकले देखाएको छ।

प्रदेश लेखा नियन्त्रक कार्यालयका अनुसार ३६ अर्ब ९ करोड ८५ लाख रुपैयाँको बजेटमध्ये प्रदेश सरकारले २६ अर्ब २५ करोड २५ लाख ४८ हजार रुपैयाँ खर्च गरेको छ। यो कुल बजेटको ७२ दशमलव ७२ प्रतिशत हो।

जेठसम्म प्रदेश सरकारले १६ अर्ब ३९ करोड ३२ लाख रुपैयाँ मात्रै खर्च गरेको थियो। त्यसपछि असारको २५ दिनमै ९ अर्ब ८६ करोड रुपैयाँ भुक्तानी भएको छ। पुँजीगततर्फ पनि जेठसम्म ६ अर्ब ८३ करोड रुपैयाँ खर्च भएकोमा असारको २५ दिनमै थप ५ अर्ब ५५ करोड रुपैयाँ भुक्तानी गरिएको छ।

यद्यपि अन्तिम समयमा खर्च बढे पनि विकास खर्चको प्रवृत्ति लगातार ओरालो लागेको देखिन्छ। चालु आर्थिक वर्षमा पुँजीगततर्फ १७ अर्ब १४ करोड ६२ लाख रुपैयाँ विनियोजन गरिएकोमा १२ अर्ब ३८ करोड ५८ लाख रुपैयाँ मात्रै खर्च भएको छ, जुन ७२ दशमलव २४ प्रतिशत हो।

पछिल्ला तीन आर्थिक वर्षको तुलना गर्दा विकास खर्च निरन्तर घट्दै गएको देखिन्छ। आर्थिक वर्ष २०७९/०८० मा १८ अर्ब ११ करोड रुपैयाँ पुँजीगत खर्च भएको थियो। त्यसपछि २०८०/०८१ मा यो घटेर १६ अर्ब ३४ करोड रुपैयाँमा झर्यो। २०८१/०८२ मा १३ अर्ब ८२ करोड रुपैयाँमा सीमित भएको विकास खर्च चालु आर्थिक वर्षमा थप घटेर १२ अर्ब ३८ करोड रुपैयाँमा पुगेको छ।