मोरङ प्रहरीका अनुसार भीडलाई हटाएर शव अस्पताल पठाउन सामान्य बल प्रयोग गरिएको हो । लाठीचार्जपछि प्रदर्शनकारी तितरबितर भएका थिए । अहिले अवस्था सामान्य रहेको प्रहरीले जनाएको छ । मोरङ प्रहरीका अनुसार शुक्रबार बिहान करिब १०:३० बजे पोखरीको बीच भागमा यादवको शव तैरिरहेको अवस्थामा फेला परेको थियो ।  

बुधबार भारतीय नम्बर प्लेटको मोटरसाइकलमा गाँजा बोकेर जाँदै गरेको आशंकामा जाँच गर्न खोज्दा यादव मोटरसाइकल छाडेर भागेको प्रहरीको दाबी छ । भाग्ने क्रममा उनले पोखरीमा हामफालेका थिए । घटनास्थलबाट मोटरसाइकलको पछाडि सवार भारतका ४१ वर्षीय शिवधर यादवलाई ६ किलो १ सय ३० ग्राम गाँजासहित पक्राउ गरिएको थियो । 

मृतकका आफन्त र स्थानीयले भने प्रहरीको लखेटाइका कारण किशोरको ज्यान गएको आरोप लगाएका छन् । घटनाको निष्पक्ष छानबिन र संलग्न प्रहरीमाथि कारबाहीको माग गर्दै उनीहरूले विरोध जनाएका हुन् । घटनाबारे थप अनुसन्धान भइरहेको प्रहरीले जनाएको छ ।