विराटनगर — करिब दुई महिनादेखि अवरुद्ध नेपाली चियाको निर्यात मंगलबारदेखि सुरु भएको छ । काँकडभिट्टा नाकाबाट इलाम टी र समर भ्यालीका दुई ट्रक चिया मंगलबार भारत निर्यात भएको मेची भन्सार कार्यालय, काँकडभिट्टाले जनाएको छ ।

भारतीय भन्सारबाट यही प्रक्रियाअनुसार नियमित क्लियरेन्स हुन थालेमा चिया निर्यातमा देखिएको समस्या समाधान भएको मान्न सकिनेछ - आदित्य पराजुली, अध्यक्ष, चिया उत्पादक संघ‘चिया बोकेका ट्रकहरू भारततर्फ जान थालेसँगै उद्योगीहरू उत्साहित बनेका छन्’, सूर्योदय अर्थोडक्स टी प्रोडक्ट एसोसिएसनका अध्यक्ष डिल्ली श्रेष्ठले भने, ‘नेपाली चियालाई भारतीय भन्सारले निर्बाध पास गरेको छ ।’ नेपाल चिया उत्पादक संघका वरिष्ठ उपाध्यक्ष शिवकुमार गुप्ताले काँकडभिट्टा नाकाबाट चिया बोकेका गाडी भारतको पानीट्यांकीतर्फ पठाइएको बताउँदै चिया निर्यातमा देखिएको अवरोध क्रमशः हट्दै गएको जनाए । ‘अहिले इलामको अर्थोडक्स चिया मात्र निर्यात भएको छ, केही समयपछि झापाको सीटीसी पनि जान्छ,’ उनले भने ।

उनका अनुसार वायरहरूलाई चियाको नमुना पठाइसकिएको छ । ‘उनीहरू हाम्रो चिया किन्न आतुर देखिएका छन्,’ उनले भने । नेपाली चिया मुख्य रूपमा भारतको सिलिगुडी र कोलकाताका बजारमा बिक्री हुने गरेको छ । चिया उत्पादक संघका अध्यक्ष आदित्य पराजुलीका अनुसार पहिले भारतले सबै खेपको नमुना परीक्षण गर्ने व्यवस्था गरेको थियो । अहिले २० प्रतिशत खेपमा मात्रै र्‍यान्डम नमुना परीक्षण गर्ने सहमति भएको छ ।

अध्यक्ष पराजुलीका अनुसार भारतीय भन्सारबाट यही प्रक्रियाअनुसार नियमित क्लियरेन्स हुन थालेमा चिया निर्यातमा देखिएको समस्या समाधान भएको मान्न सकिनेछ । यसअघि तीन साताको अवरोधपछि ६ जेठमा केही खुकुलो बनाइएको चिया निर्यात प्रक्रिया भारतले फेरि जेठको तेस्रो सातादेखि कडाइ गरेको थियो । भारतीय चिया बोर्डले आयातकर्ताको गोदाममै पुगेर चियाको नमुना संकलन गरी प्रयोगशाला परीक्षण गर्न थालेपछि व्यवसायीहरूले निर्यात रोक्न बाध्य भएको बताएका थिए ।