उदयपुर — उदयपुरगढी गाउँपालिका–७ अधेरीस्थित मदन भण्डारी लोकमार्गमा शनिबार बिहान तीर्थयात्री बोकेको स्कुल बस दुर्घटना हुँदा एक जनाको मृत्यु भएको । ३० जना घाइते छन् । 

प्रहरीका अनुसार बिहान ९:३० बजेतिर बर्दिबासबाट चतरा धामतर्फ जाँदै गरेको बा२ख ६४६८ नम्बरको दीप इङ्लिस एकेडेमी बोर्डिङ स्कुल, गौशाला–२ महोत्तरीको बस अनियन्त्रित भइ दुर्घटनामा परेको हो ।

दुर्घटनामा महोत्तरीको बर्दिबास नगरपालिका निवासी ५५ वर्षीय विमलेश दत्तको मृत्यु भएको छ । गम्भीर घाइते उनको उपचारको क्रममा मृत्यु भएको प्रहरीले जनाएको छ ।

घाइतेहरु मध्ये १२ वार्षिक सन्देशकुमार चौधरी र ३८ वर्षीया रसिलाकुमारी चौधरीको अवस्था गम्भीर रहेको छ । उनीहरुलाई थप उपचारका लागि विराटनगरस्थित न्यूरो अस्पताल रिफर गरिएको छ । 

बसचालक २९ वर्षीय जीवन आले मगर र अन्य यात्रु सामान्य घाइते भएका छन् । दुर्घटनामा परेका यात्रुहरु धार्मिक भ्रमणका क्रममा चतरा धामतर्फ गइरहेका थिए । दुर्घटनाको कारण खुल्न बााकी रहेको र घटनाबारे अनुसन्धान भइरहेको जिल्ला प्रहरी कार्यालय उदयपुरले जनाएको छ ।