संखुवासभा — लगातार वर्षापछि आएको बाढीले संखुवासभाको चैनपुर नगरपालिका र पाँचखपन नगरपालिका जोड्ने सडक खण्ड पूर्ण रूपमा अवरुद्ध भएको छ । शनिबार बिहान–करिब ४ बजे कल्लेरी क्षेत्रमा आएको चिउंखुवा खोलाको बाढीले सडकमा ठूलो क्षति पुर्‍याएपछि आवागमन ठप्प भएको हो ।

स्थानीयका अनुसार पाँचखपन नगरपालिका अन्तर्गत बिहीबारे, भैँसीचोक, पिपलडाँडा हुँदै चुङ्खुरुङ जाने सडक निर्माणको काम भइरहेका बेला खोलामा एक्कासी आएको बाढीले सडक बगाएको हो । बाढीका कारण चुङ्खुरुङतर्फको भागमा ठूलो पहिरो खसेपछि सडक पूर्ण रूपमा बन्द भएको छ । हाल उक्त सडक भएर कुनै पनि प्रकारका सवारीसाधन सञ्चालन गर्न नसकिने अवस्था रहेको छ ।

स्थानीय राजेश बस्नेतले कल्लेरी क्षेत्र वर्षौंदेखि जोखिममा रहेको बताउँदै दीर्घकालीन समाधान आवश्यक रहेको बताए । उनका अनुसार खोलासँगै कम्तीमा १५ देखि २० मिटर आसपासको भागमा बलियो संरचनासहितको रोकथामको व्यवस्था अनिवार्य गर्नुपर्छ ।